Aizawl: Activist lar, engineer leh educator ni bawk, Sonam Wangchuk-a chuan MNF President Zoramthanga chu New Delhi-a Mizoram House-ah a kawm a, India-a inremna hlawhtling leh tlo ber pawla ngaih, Mizo Memorandum of Settlement zir chian leh Mizo Peace Accord-a sulsutu Zoramthanga tawnhriatte hriat chian lehzual a duh thu a sawi.
Thawhtanni khan an inkawmnaah Wangchuk-a chuan Mizoram leh India sorkar inremna chu ropui a tih thu leh Ladakh-a a thiante nen zir chian belh tura Mizorama zin a duh thu a sawi a. Chief minister hlui, Zoramthanga pawhin he inremna hi mi mal leh ram dangte pawhin an zir fo tawh thu hrilhin India sorkarin remna a duhzia lantir nan Laldenga, electoral roll-a chuang lo kha India sorkarin interim agreement-ah tul an tih avangin Indian Constitution ang thlapa thlan tlin, Mizoram UT Chief Minister Lal Thanhawla pawh an lantir duh ngam thu te a sawi lang bawk.
Wangchuk-a chuan Zoramthanga chu kum 20 chhung underground movement-a awm hnuah kum 15 chief minister ni chhunzawma kum 36 chhung MNF president ni tlat thei a nihna chu mak a tih thu leh a fak hle thu a sawi a. Zoramthanga hi Ladakh-a zin turin a sawm bawk.
Zoramthanga hian Wangchuk-a hnenah hian a lehkhabu ziah, ‘From Guerilla Fighter to Chief Minister’ leh Memorandum of Settlement original scanned copy a hlan nghal a ni.