Congress President Mallikarjun Kharge-a chuan dik tawk lova electoral roll Special Intensive Revision (SIR) kalpui a nih avangin Chief Election Commissioner (CEC) Gyanesh Kumar-a chu bâng nghal turin a phut a, Prime Minister Narendra Modi-a pawh inthlan buaipuitu hotu ‘nawrtu’ a nih avanga bâng ve turin a phut bawk.
Congress Working Committee (CWC)-a thu a sawinaah Kharge-a chuan an party chuan Kumar-a leh sorkar laka lungawi lohna lantirin campaign an kalpui dawn a, khawlaiah an chhuak ang a, parliament-ah pawh an au chhuak dawn tih a sawi.
Kharge-a hian thil panga a phut a sawi chhuak a, heng zingah hian vantlang hmuh leh political party-te hnena electoral roll-a thil danglam/inthlak lian pho chhuah pawh a tel.
A hrana chhuitu tur, hun bi tiam siamsaka thil dik lo lo irh chhuakte finfiahna hai chhuak tur din a phut bawk.
Roll atanga hming paih zawng zawngte chu chiang taka hrilha an buaina sawi theihna pek te, thil pawimawh zawng zawng langtlang taka tih vek te a tul tyhu a sawi bawk.
“A pawimawh ber chu India-a voter-te hian an vote hi a him ngei tih an hriat a ni,” a ti a. Inthlana chak leh chak loh ai pawhin mipui rorelna leh dan hum a pawimawh thu a sawi bawk.
Kharge-a hian Modi-a sorkar chuan voter-ten vote an thlak theihna tihchhiatsak a tum niin a puh a, pawisa tlang lian tihthih leh ‘Votebandi’ tia a sawi nen a khaikhin.
“Kum 10 liam taah khan kan prime minister hian India-a eibar tichhiain ‘Notebandi (demonetisation)’ a ti tawh a. Kum 10 hnuah kan mipui rorelna kalhmang chu sawi hlawh tak ‘Votebandi (voter disenfranchisement)’ hmangin a khawih leh a ni,” a ti.
Congress chief hian Kumar-a chu a bân ngei a phut a, election commissioner pahnihte thil tih pawh a sawi chhuak.
“Election commissioner pahnihten CEC chet dan chu ‘ram phatsanna leh tih dan phung lo’ tih an sawi a, ram pumin rorel lai party hlawkpui tur angin a ti niin an ngai vek tawh a ni,” a ti.
“Hetiang hnuaiah hian a pisaa a awm reng theihna chanvo a nei lo va, lak chhuah nghal tur a ni a. Prime minister ngei pawh hetianga ti tura nawrtu a nih angin a bâng tur a ni,” a ti.
Congress party rorelna sang hi Indian Express chanchinbuin SIR chungchangah election commission chhunga member pathumte inrem lohna awm a chhui chhuah atanga ni rei lote hnuah an thutkhawm.
Indian Express hian election commissioner pahnih, Sukhbir Singh Sandhu leh Vivek Joshi te chuan SIR kaihhnawihah thla 10 chhungin vawi 14 vel CEC hi an hnial a, lungrual lovin thutlukna, ama thu angin a siam ni thei angin an chhuah a ni.
Election commission chuan mi mal thlirna hrang chu a awm thin ngei a; mahse, thutlukna chu lungrual taka tih vek zel a ni tih an sawi ve thung.
CWC thutkhawm hi Kharge-a’n a kaihruai a, party chief hlui, Gandhi nufa bakah general secretary zingah Priyanka Gandhi Vadra, Jairam Ramesh, KC Venugopal, Sachin Pilot leh Mukul Wasnik te pawh an tel.
Congress rorelna state-a chief minister – DK Shivakumar (Karnataka), V D Satheesan (Kerala), A Revanth Reddy (Telangana) leh Sukhvinder Singh Sukhu (Himachal Pradesh) te an tel bawk.