Myanmar-a sipaite chuan Bangladesh nena an inrina bawra indona a nasatna hmun, Rakhine state-a bazarpui bul lawk thlawhna hmanga an kahnaah mi eng emaw zat an thi niin heng lai hmun thunun mektu hel pawl leh tual chhunga tanpui hna thawktuin a sawi.
Sipai sorkar nena indo mek hel pawl, Arakan Army chuan Kyauktaw khaw beihnaah hian mi 33 vel an thi a, mi 36-in hliam an tuar bawk tih an sawi.
Thi leh hliam tuar zat hi helai hmuna hna thawka awm, tanpui hna thawktu pakhat, Wai Hun Aung-a pawhin a sawi bawk.
Myanmar-ah hian kum 2021-a sipaiten mipui thlan roreltute an paih thlak hnuah anmahni duh lotuten bei letin tual chhung indona a chhuak nasa hle a. Sipaite beitu zingah hian Arakan Army pawh telin ram chhung hmun hrang hrangah hel pawl hrang hrang nen an inbei nasa hle a ni.
Wai Hun Aung-a chuan, “An beih lai hmun hi indona hmun atanga hla tak a ni a, buaina nen hian inzawmna engmah nei lo a ni,” tiin state chhung hmar lama tuipui kama awm, Kyauktaw khaw chungchang hi a sawi.
Myanmar sorkar chuan he beihna thleng nia sawi chungchang hi engmah sawi a la nei ve lo va, a hmaa thil thleng tawh thinah erawh chuan sipaite chetnaah hian ‘civil mite tawrhna a thlen loh theih dan ang ber tura thil tih thin a ni’ tih an lo sawi tawh thin.
Arakan Army leh Wai Hun Aung-a chuan tun tuma Kyauktaw khaw beihna hi thlawhna hmang bawka December thlaa Rakhine khawthlang lama damdawi in beihna thleng, mi 30 vel an thih hnua tum khat beihnaa thihna a thlen tam ber tum niin an sawi.
Myanmar-a tual chhung indona a chhuah hnuah sipaite hian thawk khat lai khan an ram zau tak, a bikin ram dang nena an inrin hnaih tam tak chu hel pawlte lakah an chân a, tun hnaiah bei letin hmun eng emaw zat erawh an la let leh tawh thung.