Aizawl khawpui kawng chepzia kan hria a, zauh ngaihna eih a awm tawh lo. Lirthei erawh a pung thur thur a, nitin traffic jam kan tawng ta fo mai.
Hetih lai hian political party leh pawl hrang hrangin punkhawm kan uar a, kan punkhawm apiangin inlaklen tum niawm takin khawpui laili taka awm Vanapa Hall kan pankhawm a, lirthei tlan tam tak kan tikhaihlak thin.
A chang chuan kawng chanve khar a ngaih phah a, hei hian a nghawng chu lirthei tlan dan mumal lo leh traffic jam nasa zawk a ni.
Assam Rifle hnawtchhuakin Lammual ram kan nei tawha, hengte hi punkhawm nana hmun tha lutuk a ni. A chhungah nise lirthei duh thalin a park theih a, mahse hman kan tum leh chuang lem hlei lo a, khawpui kawng tichep leh nek zawnga inlaklen nuam kan la ti fo hi chu a hmasawn lo zia ngawt mai.
Tihpui hrang hrang a la awm ang, party leh pawl hrang hrangin kan la nei chho leh zel dawn, hetih hunah hian kan tam dawn tih kan inhriatsa chuan Lammual lam emaw R. Dengthuama Hall lam emaw pan mai hi ching ila, a tel ve lo mipuite tan harsatna kan siamsak lo bawk ang.
Inlaklen leh lansarhna kan tum luatna hian buaina min siam zawk fo tih hi hre thar ila, a kal turte mila ruahmanna siam thin kan ni tih hrerengin kan punkhawmna hmun tur thlang thiam ila, kan party/pawla tel ve lote harsatna siamsak lo zawnga khawsak i zir thiam tawh bawk teh ang u.