Aizawl: AMC tana Urban Development & Poverty Alleviation (UD&PA) Department-in Special Assistance to States for Capital Investment (SASCI) loan atanga drain siamna tur Rs vbc 5 a semnaah, opposition ward pahnih an telh ve duh lo nia sawiin Mizo National Front (MNF) chuan ZPM sorkar leh an khawsak dan chu pawi an tih thu leh an dem tak zet thu thuchhuah an siam.
MNF thuchhuah tar lan danin, composite work drain siamna tura sum a semnaah ZPM tlinna AMC ward-ah te sem niin, Ward No. IX (B. Lalawmpuii, MNF) leh Ward No. XIX (Dr. Lalmalsawma Nghaka, MNF) bialah te pek ve a ni lo. Hei hian ZPM chu hleihnei lo tura intiam chung si a, party dang thlauhthlatu leh innekchep zawnga khawsa an nih zia a pho lang a, an ‘Kalphung Thar’ intiamna chu lemchanna mai a ni tih a tilang chiang hle nia sawiin Zoram mipuiten an khawsak dan an ning tawh hle a ni tih an tar lang.
MNF chuan AMC-ah sorkarna an lo chelh tawh thin party dang hleihneihna leh thlauhthlakna hetiang a la awm ngai loh thu sawiin, tun hi thil zahthlak tak a hmasak ber tum a ni tih an sawi a. AMC hmasaa hmasawnna hnathawh kal mek leh ruahmansa te pawh ZPM sorkarin stay order chhuah a court-a an zualko avangin hnathawh tam takin a tawrh phah nasa hle niin an tar lang bawk.