Election Commission of India (ECI) chhungah sawi neuh neuh a awm mel laiin eptu tangrual, INDIA chuan Electronic Voting Machine (EVM) chu hmang tawh lova ballot-a kir leh ngei a ngaih thu a sawi.
ECI website-a a lan dan chuan EVM hi kum 1982 khan Kerala-a Paravur assembly bial inthlanah a vawi khat nan hman a ni a. Kum 1998 khan hman uar hret hret niin kum 2003 atang khan state inthlan leh by-election zawng zawngah hman a ni ta a ni.
Nilainia INDIA thutkhawmah Congress chief Mallikarjun Kharge-a chuan thil phut panga a sawi chhuak a: inthlan lo awm turah SIR kalpui hmaa mi electoral roll hman, roll atanga paihte insawi fiah theihna tur mumal tak siam, thawktute tihsual vanga voter paih a awm lohna tura hma lak, ballot hmanga vote thlak, vote nei tharten awlsam leh mawl taka inziah luhna an neih theih te a tel.
Kar hmasa khan Indian Express chuan election commissioner pahnih, Sukhbir Singh Sandhu leh Vivek Joshi ten thla 10 chhungin vawi 14 lai SIR chungchangah Chief Election Commissioner Gyanesh Kumar-a an hnial nia tar hnuah ECI-ah hian sawi neuh neuh a awm tan a ni.
Kum 84 mi, Kharge-a chuan ram puma ‘khua leh tui leh political party zawng zawngten ECI kal dan chu au chhuahpui a ngai’ tih a sawi.
“Kum tam tak chhung EVM chungchanga kan zawhna chhanna kan zawng dawn a. Voter-list khawih kual dan te, sawi fiah lohva roll-te tihdanglam dan te pawh kan zawt thin a. Pu Rahul-a’n Mahadevpura, Aland, Haryana leh Maharashtra-ah a finfiahna a pho lang tawh a. Hetiang bawk hian INDIA-a party-te hian heng thilah hian kan au chhuah a ngai a, a thamral tur a ni lo,” a ti.
“EVM chungchanga kan dinna a chiang a. Heng kawl hi BJP chuan a tul avanga hman niin an sawi a, Pu Rahul-a chuan chak nan an hmang tih a sawi a. Heng khawlte hi nakin zelah hman kan phal tawh tur a ni lo va, ballot-ah khan kirin India-a kan inthlan dan hi kan rinngam leh a ngai a ni,” tiin Congress chief chuan a sawi.
Mipui rorelnaah chuan mipuiin langtlang taka thil tiin institution-te an ringngam tur a ni tih a sawi.
SIR kalpuiah hian voter 13.3 zet paih niin Kharge-a chuan a sawi a, ‘mak tak a ni’ tiin a sawi.
INDIA hi Nilaini khan an thukhawm a, SIR leh ECI chhunga sawi neuh neuh awm chungchang an sawiho va, Thawhlehnia Congress Working Committee (CWC) thukhawm chuan CEC Kumar-a chu bâng ngei turin an lo phut tawh bawk a ni.