US President Donald Trump-a chuan North Korean hruaitu, Kim Jong Un-a chu ‘thian’ tia sawiin Pyongyang-in ralthuam a neih chungchangah ‘kei hi ka awm chuan a tha zel ang’ a ti.
Trump-a hian Washington, DC- thuthar lakhawmtuten Thawhlehni (India-a Nilaini zing lam)-a an kawmnaah North Korea-in nuclear ralthuam a neih laia Iran-in a neih a phal ve loh chungchang an zawt.
“A ngaihven awm khawp mai. A chhan chu president hrang a nih vang a ni a, an dang ve lo a ni,” tiin a hmaa US sorkar chungchang a sawi.
“Kim Jong Un-a hi ka thian a ni a. Trump-a a ngaina a, mi tam tak ngainat a nei lo. Kei hi khawvel puma a mi ngainat awmchhun ka ni a, kei pawhin ka ngaina a ni,” a ti.
North Korea-in nuclear a neih chu ‘a tam tham hle’ a tih rualin, ‘keini ang chu a ni lo’ a ti.
“In hriat angin kei hi ka awm chhung chu a tha zel ang. A chhan pawh inhria a, min zah a, min ngaina a ni,” a ti.
South Korean Defence Minister Ahn Gyu-back-a chuan kar hmasa khan hmar lama an thenawm ram hian nuclear ralthuam 80 atanga 120 inkar a nei tih a lo sawi tawh a, hei hi Trump-a’n 57 nei anga a lo sawi aiin a tam zawk.
Trump-a hian US leh Israel tang dunin Iran an beih thla riatna a kai hnaih mek laiin Kim-a lam hawia inpawh thar leh dan a dap mek bawk.
US president hian Israel nen February 28 atang khan Iran beiin nuclear ralthuam nei lo turin a duh a. Tehran chuan ralthuam siam a tum lo va, kum 2015-a khawvel ram liante nena inremna an neih angin an hrek loh nan muanawm takin hma a la dawn tih a sawi a. Trump-a erawh chu kum 2018-a president a nih hmasak lai khan inremna atang hian a inhnukdawk.
US-Israel tangh dunin Iran an beihna hian khawvel puma energy inpekna a tibuaiin a man pawh a san phah hle a, November-a midterm inthlan turah pawh Trump-a boruak a hniam phah.
Trump-a hian kum 2018 leh 2019 khan North Korea tlawhin Kim-a nen an inkawp a, US-in nuclear ralthuam puah tawh lo tura a duhna erawh a hlawhtling lo va. Hemi hnu hian Kim-a hian a siam zui nasa a, Russia kawmngeih zual sauhvin Ukraine indonaah a pawh a pui a, China nena an inkungkaihna a titha hle bawk.
Trump-a hian a hma khan kumin kum tawp hma ngeia Kim-a nena inkawm leh a tum thu a lo sawi tawh a. North Korea chuan hemi chungchangah hian engmah sawi a la nei lo.