Aizawl: Mizoram Agriculture & Farmers’ Welfare Minister PC Vanlalruata chuan New Delhi-a National Conference on rabi campaign neihah Union Agriculture Minister Shivraj Singh Chouhan hnen atangin central scheme hrang hrang atangin sum sanction Rs vbc 75.79 hlan a ni.
Union Agriculture & Farmers’ Welfare Ministry buatsaih conference-ah hian rabi crop (thlasik thlai) chungchanga hmalakna leh hmachhawpte thlir ho a ni a. Union minister chuan PC Vanlalruata hnenah hian Rashtriya Krishi Vikas Yojana (RKVY) scheme pawisa Rs vbc 27.84 leh Krishonnati Yojana (KY) scheme pawisa Rs vbc 47.95 release order a hlan a ni.
Agriculture minister chuan Mizorama agriculture tihhmasawn nan leh kuthnathawktute thlai thar phurchhuah nan agriculture link road tha mumal tak mamawh a nih thu a thlen a. PM RKVY scheme hnuaiah link road siamna tur telh a, oil palm leh thlai dang phurh zangkhai nan monorail enchhin mek a nih thu leh internet harsatna avanga Sub-Mission on Agriculture Mechanisation (SMAM) scheme dilna internet kaltlang (online) chauha thehluh ngai chu offline-a kalpui leh a nih theih nan a ngen bawk.