Aizawl: September 30 leh October 1, 2026 chhung awh tur Young Indians Parliament (YiP) Regional Round chu Nilaini zing dar 9:30 khan Assembly Annex Hall, Aizawl-ah neih tan a ni a, School Education Minister Dr. Vanlalthlana chuan khuallian niin he intihsiakna hi a hawng.
Regional round-ah hian award hrang hrang pariat buatsaih niin hmarchhak state hrang hrang atanga zirlai thlan chhuah 51 an tel a, ram rorelna kalphung leh hruaitu tha nih dan zirchhuahna tura buatsaih he intihsiaknaa ti tha te hian New Delhi-ah national level competition an hmachhawn chhunzawm dawn a ni.
Dr. Vanlalthlana chuan Yi Mizoram Chapter leh Confederation of Indian Industry (CII)-in hetiang intihsiakna entawntlak tak an buatsaih chu lawmawm a tih thu sawiin naupangte chu hma lam huna ram hruaitu leh hna pawimawh chelhtu tur an nih avangin he platform hi an hma lam hun hriltu pawimawh tak a nih thu a sawi a. Leadership atan communication skill a pawimawh tih a sawi.
He intihsiaknaah hian Mizoram atangin school panga (St. Paul’s, Mount Carmel, Neuhof, Synod, leh St. Stephen’s) atanga naupang thlan chhuahte leh Assam leh Nagaland atanga naupang 28 telin, an vaiin zirlai 51 an intihsiak dawn a ni.
Zirlaite hi ruling leh opposition-ah thenin, rorelna in sanga an tih thin angin constituency tana thil pawimawh sawiho, zawhna leh chhanna, leh bill draft-na hunte hmangin inelna an hmachhawn an ni.
YiP hi CII hnuaia youth wing pakhat, Young Indians (Yi) national flagship hnuaia hmalakna a ni a. |halaite zingah leadership, constitutional values leh active citizenship tuh zel a tum a ni.