Sorkarin a chhinchhiah danin Democratic Republic of Congo (DRC)-ah Ebola leng mek chu mi 5,000-in an thihpui tawh.
Province 26 awma pariatah hri hi darh tawhin mi 10,300 chuang kai an awm tawh.
May thla atanga hri darh tan hi August thla khan an rama thihpui tam ber a lo ni tawh a, a kai zinga 48.6%-in an thihpui.
Health ministry-in dinhmun thar a tihchhuahah a len nasatna lai ber chu buaina a tamna, hri leng beih a khirhna, hmarchhaka Ituri province a la ni reng.
Kenya, Nigeria leh Uganda-ah pawh kai an awm tawh.
UN chuan tun hi DR Congo-a Ebola a len vawi 17-na a ni a, a kai an tam tum pahnihna a ni.
Africa-a World Health Organization (WHO) pisa chuan hri leng dangchat tur hian ‘inkhuahkhirhna, a kai tamna hmun thlen theih leh khawtlanga tul inhrilh tam’ a la ngai tak zet tih an sawi.
Tun tuma Ebola leng hi Bundibugyo chi a ni a, a damdawi leh a invenna pawm a la awm lo.
UN chuan DR Congo-a Ebola a len nasat ber chu 2018-20 inkara mi 2,299 an thihpui kha niin a sawi.
Thihpui an tam ber chu Africa khawthlanga kum 2014 leh 2016 inkara a len kha niin mi 11,325 chuang an thi a, Italy, UK leh US bakah ram dangah pawh a darh nual bawk.
Uganda-ah August thlaa rei lo a len chhungin mi pahnihin thihpui tawhin a kai mi 20 an awm hman a; mahse, tunah chuan tihtawp a ni tawh a. DR Congo nena inkalpawhna an la khuahkhirh reng thung.
Kenya-ah mi pahnih thi awm tawhin mi pakua kai an awm tawh.
Nigeria-ah Inrinni khan mi pahnih rinhlelh an awm a, disease control centre chuan an dah hrang a, endik nghal mek a ni tih an sawi.
October thla tir khan Nigeria-ah hian hmeichhia kai a lo awm tawh a; mahse, Switzerland-ah enkawl tura lak a ni a. European Centre for Disease Prevention & Control chuan Europe-a a len theihna hi ‘a a hniam hle’ tih a sawi.