Lemchanthiam Dakota Johnson leh zaithiam Machine Gun Kelly te chu an inkar a nghet chho zel nia sawi an ni a, kartawp khan an inzui lai hmuh a ni bawk.
Kum 37 mi Dakota leh MGK te hi inhaw lo takin California lamah zan hun an hmang lai niawm tak hmuh an ni a, an pahnih hian September thla atang khan an inzui hmuh tan an ni a, inkawm satliah mai mai nia ngai an awm laiin kartawp khan hun an hmang dun lai hmuh a nih leh takah chuan an inkar a tha chho hle nia sawi an ni.
Anmahni hrechiangtute chuan Dakota hian MGK bulah hian hun nuam tak hmangin, a mipa duhzawng tak a ni, an ti a, an inkungkaihna pawh a nghet hle tawh niin an sawi.
Dakota hi kumtir lam khan musician Role Model nen an inzui ve zuai a, mahse an inkar thawnthu hi a rei lo thung. October 2017 atanga June 2025 chhung khan Coldplay frontman Chris Martin nen an inzui a, an inkawp chhung hi rei viau angin lang mahse, hemi chhung hian on-and-off an ngah viau thung a ni.
Hetihlai hian MGK pawh hian lemchanthiam Megan Fox nen hun rei fe inkawpin, fanu kum khat mi an nei hman bawk a, an inkar a tawp zui veleh ta bawk a ni.