Miss Thailand hlui Panadda “Boom” Wongphudee chu a charity foundation din hmanga sum a hmuhte tichingpena puhna avangin Bangkok-ah man a ni.
Bangkok-a man a nih hian engmah sawibuai a nei lo a, thuneitute hnenah Wongphudee hi inpe nghalin, Bangkok court chuan a chungchang ngaihtuah a nih tur thu a sawi.
Kum 50 mi, an ram lemchanthiam ni bawk hian mi harsate tan charity pawl dinin, heng atanga a sum hmuhte hi a lo chheprelh thin nia sawi a ni a, hei hi vantlang bumna, sum tihchengpen leh Thailand’s Computer Crime Act bawhchhiatna nia sawiin, man a ni ta a ni.
Hemi chungchangah hian a pasal, sumdawng leh fitness influencer ni bawk Atip Anantawan, Got tia hriat lar pawh chhui mek a ni bawk.
Bangkok thuneitute chuan Wongphudee hian a charity dina a sum hmuhte hi a nihna tura hmang lovin, a mimal inhaivur leh inlaklen nan a hmang niin an sawi a, hei hi chhuichian ngai tak a nih thu an sawi. Wongphudee hian an chhuichiannaah hian thiam loh a chang a nih chuan an ram dan angin hun rei zawk jail tan a hmabak theih a ni.