Court-in khuahkhirhna thupek siam mah se India-a khawpui ber, Delhi-ah chuan Diwali lawm nana hal mawi nasa taka hal a nih hnuah Thawhtanni tuk khan boruak bawlhhlawh lam tehna (air quality) chu a sang hle.
Zing dar 09:00-ah khan Delhi-ah hian air quality index (AQI) chu 370 a ni a, Central Pollution Control Board (CPCB)-in a chhinchhiah danah ‘chhe tak’ huang a ni a. AQI 50 thleng hi ‘tha’ tih niin a kalsan thui hle.
Mi maktaduai 20 vel chenna khawpuia hmun tam taka tehna dah tam zawkah chuan 400 chuang a kawk thleng a, hei hi ‘hlauhawm’ chin huang tihna a ni.
India-ah hian Supreme Court chuan a hmain boruak tichhe nep chi, green hal mawi chauh hal phalin chu pawh Diwali kartawp liam ta chhung khan hun bi tiam chin neia phalna siam a ni.
Delhi leh sumdawnna khawpui, Mumbai-ah chuan hal mawi hal hi zan lai thlen hma zawng chuan hal pawh a tlem hle a, a hnu lamah erawh dan pangngai ang thova hal zui a ni thung.
Thlalak darhah chuan Delhi lailia hmun hriat hlawh tak, sorkar pisa leh parliament awmna bul lawk, India Gate velah chuan hal mawi khu a zam chuk a ni.
Thawhtanni tuk khan Delhi hi Swiss pawl pakhat, IQAir-in live ranking a siamah khawvela boruak bawlhhlawh pathumna a ni a, Pakistan-a Lahore chu AQI san berna niin 563 a tling a, hei hi mihring tana hlauhawm tak zet, ‘hazardous’ an tih huang a ni.
India hmar lam hmun tam takah hian thlasik lo thleng tan tir, boruaka lirthei khu leh thil sak leh siamna khu a tan duh lai leh thlai sengna ro khu a tam lai hian kum tin boruak bawlhhlawh avangin buaina a awm ziah thin.
Harsatna hi Delhi ang chi khawpui lianah hian lirthei tam lutuk te, hmasawnna hna thawh avanga khu tam avangtein a zual bik thin a. Mi cheng tam tak chuan thawk lamah harsatna an neih phah nasa thin.
Delhi-ah hian chawlhkar eng emaw zat chhung boruak tehna hi ‘chhia’ huangah a lo awm tawh a, Zirtawpni khan a zual zel tur venna tura inkhuahkhirhna kalpui thin chhawng hrang hrang zinga a pathumna hman tan a ni a. Hemi hnuaiah hian sikulte pawh online-a kai tura tih a ni.