Aizawl: ZPM General Headquarters party pisa-a Thawhtannia chhung inkhawm neihah Revenue leh Supply Minister B. Lalchhanzova chuan ZPM rorelna hnuaiah mipuite chu lal tak tak an nih thu leh sorkar thil tum ber chu mipui chhiahhlawh leh tirhkah nih a nih thu a sawi.
B. Lalchhanzova chuan sorkar kal taa ram pass lem tam tak awm thin te chu dan tha zawk hmanga a chin fel hna buaipui mek a nih thu leh MCS junior te thlengin thuneihna sang zawk (SDC) pe a administration siamrem a nih thu a sawi a; FCS & CA Dept. lamah mi rethei zawkte chanvo mi awmtheiten an la hrang thin chu titawpin, ration card hman dan dik tak kalpui leh buhfai buk dik pek a nih theih nan retailer-te lawmman thlengin tihsanna a nih thu a sawi.
Ram hlui zia politics uchuak taka induhsakna leh mipui huap zo lo rorelnate bansanin, thlai thar lei, health care, administration reform, ruihhlo do leh dan dik taka hna lak thlengin tum mumal tak nena hma lak mek a nih thu a sawi bawk.
B lalchhanzova chuan Congress leh MNF sorkar kum 36 chhung thiltihte nen ZPM sorkar kum thum bawr lek infrastructure siam dan khaikhin tuten pawn lam hmuh theih hmasawnna piah a rilru lam siam dikna kalpui mek a nih zia hriat an mamawh thu a sawi a, contractor leh retailer-te tan hlawkna ringawt aiin thawh dik leh nih dik uar a nih tak zawk thu a sawi.
Thangthar Gen Z-te leh Zofate zawng zawng pawh social media hmanga hmasang leh tunlai sorkar hna lak fair dan te khaikhin tura chona siamin, ZPM sorkar dik leh fel taka ke pen mek chu tawiawm zel turin mipui a sawm bawk.