Favang boruak a rawn thaw chho tan a, khawlum lutuk kiang hret hret zelin, favang boruak duhawm tak a rawn inher chho mek zel a, chhuah vah a nuam tan chho viau. Mahse, kan fimkhur lehzual erawh a tul hle.
Awl len hnu, mitinin hahdam nan leh hun hlimawm leh nuam tak hman kan duh hun, kan hnathawhna lama buai reng renga kan hun hman thinte tlansan rih a, intihthawven kan duh hun a nih avangin kan fimkhur lehzual a ngai a, chhiatna nasa zawk thleng lo tura kan fimkhur a ngai hle a ni.
Tui awmna lamte kan pan nasa a, mahse hrechiang lo leh tuichen thiam lote pawhin kan ba sa ngam mai thin avang hian nunna tam tak lakin a lo awm tawh a, kan tui kalna tur hmun hma leh awm dan kan hriatfiah hmasak a tul hle bawk.
Tin, lirthei khalhtute leh ramhnuaia chetla tura chhuakte pawhin midangte harsatna siam lo zawnga khawsak hram hram tum ila, kan zalen tum luatah hian keimahni mai ni lo, midangte harsatna leh nunna hial kan laksak thei a ni tih hriain, i fimkhur thar sauh sauh ang u.
Tun hun hi fimkhur hun, khawiah pawh awm ila midangte harsatna kan siamsak loh hun, rilru fim tak kan put hun a ni tih hrereng chungin favang kawl eng hi i hmuakin, i hmang tlang bawk teh ang u.