Aizawl: Thawhtanni khan SAD Conference Hall, MINECO-ah Mizoram Chief Electoral Officer (CEO) R. Zarzosanga hovin political party aiawhte thukhawmin, ‘Special Summary Revision of Photo Electoral Rolls’ neih tur chungchanga thil pawimawh hrang hrang leh hmalak dan turte an sawi ho.
Thutkhawm kaihruaitu CEO R. Zarzosanga chuan Election Commission thupek angin November 30, 2026-ah Integrated draft electoral roll tar chhuah a nih tur thu leh qualifying date atan January 1, 2027 hman tur a nih thu a sawi a, hetih hun thlenga kum 18 tling, India khua leh tui roll-a la chuang lo zawng zawngte ziah luh vek an nih tur thu a sawi.
Electoral roll dik leh felfai ber siam a nih theih nan political party-te chu thawhhopuiah a sawm a, Booth Level Agent (BLA) ruat kawnga an pawimawhna hriaa fimkhur tura chahin, polling station khata voter 1,200 aia tam an awm loh nan polling station siam rem leh a thar siam pawh November 20, 2026 hmaa zawh fel a nih tur thu a sawi bawk.
He ruahmanna hnuaiah hian November 30 atanga December 30, 2026 chhung claims & objections neih a nih hnuhah, January 16, 2027 hmaa buaipui felin January 21, 2027-ah electoral roll hi final-a tarchhuah a ni dawn a ni.
Thutkhawmah hian BJP, INC, ZPM, ZNP leh MPC aiawhte telin zawhna leh chhanna hun hman a ni bawk.