Aizawl traffic police te chuan zan lama lirthei endik an kalpui tum nga atangin mi 297 an man tawh thu an sawi a, zan lam special drive hi a tul anga neih zel an tum thu an sawi bawk.
Hunpui kan thleng dawn a, zan lam nun a zalen leh dawn tih a hriatreng bawk. Hetih hun hi fimkhur hun, mimal tin khuahkhirh kan ngaih hun, zan lam nun thlenga kan fimkhur lehzual hun a nih avangin traffic police lam pawhin special drive hi an neih ngawrh lehzual a tul hle.
Chhiatna hrang hrang thlen duh hun, lirthei chesual tam tak awm hun a ni chho dawn a, kan fimkhur lohna avangin nunna tam tak lakin a lo awm tawh a, ramtuileilo leh bawksawp ta tam tak an lo awm tawh bawk. Kan zalenna hman thiam kan zir thar pawh a tul viau.
Zan lama Aizawl traffic police ten special drive an neih thin hi chhunzawm ni zel thei se la, zan lama midangte tana bengchheng siam thinte thleng hian an tawm-im lehzual theih nan hmalak ni chho se la, kan khawpui nun hi ralmuangin i siam zel teh ang u.
Aizawl traffic police te pawh hi indaih lo tak an ni a, kan sawi fo tawh thin angin sorkar hian thuam chak lehzual thei se la, kan khawpui himna atana an tangkaizia hre thar chungin an hmalaknate hi theihtawpin thlawp tha ila, zan lam duty pawh hi ngawrh lehzualin nei chhunzawm mawlh teh se.