Aizawl: India ram pumah politics-a than harhna a thleng mek a, kum 2029-ah chuan ruling BJP sorkar paih thlak an ni tawh dawn tih MPCC Vice President John Rotluangliana chuan a sawi.
Thawhlehni khan Chhiahtlang North VC House-a Tuikum Block I Political Training neiha khuallian John Rotluangliana chuan, hmanni lawka Delhi-a kawngzawhnaah a tel ve ngei thu leh ram chhung hmun tinah BJP duh lohna a lian tawh hle tih a sawi a. West Bengal-ah te pawh electoral roll tifel lovin inthlan an neihtir thu sawiin, BJP thil tih dik lo hrang hrangte chu a lo lang chhuak zel tih a sawi.
Mizorama sorkar ding mek ZPM chu an rinhlelh thu sawiin, thil engkim an zawh loh tur leh tih loh tur an ti thin niin a sawi a. UNNATI scheme hmanga chief minister fapa tan Rs vaibelchhe 15 zet puk a nih thu sawiin, Banakaih policy hnuaiah pawh mi 700 vel bak an la pe lo va, Congress sorkar laia NLUP sem dan nen phei chuan inthlau tak a ni, a ti bawk.
John Rotluangliana chuan ZPM hian thil thar tih tak tak pawh an la neih hlei hlei loh bakah Congress sorkar laia Mini Hydel Project pasarih lo siam tawhte chu an hralh daih a, Lengpui Airport thlengin hralh an tum mek bawk tih a sawi a. Senior Citizen-te phei chu ram dang angin zahna leh a thlawna bus chuan man te pek a nih mek laiin, Treasury kawtah intlartir an ni a, kum upa te zahna ZPM hian an nei lo hle tih a sawi.
Zoram mipuite chu party hrang hrangte hnathawh tawh leh ram tana policy hlawhtling tak tak zawm thin party-te ngaihtuah a, leiba ngah leh hmasawnna hralh thin ZPM aiin ram tana hmasawnna thlentu Congress party-a lo kir leh vek turin a sawm a ni.
He hunah hian John Rotluangliana’n an party zawm thar mi eng emaw zat a lawm lut bawk.