Aizawl: Kelsih khuaa sak mek, Ropuiliani Tribal Freedom Fighters Museum (RTFFM), Prime Minister Narendra Modi-a’n November 15, 2026-a biakhmuhtheihna kaltlanga a hawn tur inpuahchah dante chu Larsap General (Dr) Vijay Kumar Singh chuan Thawhlehni khan a hmunah tlawhin a enfiah.
Larsap chuan zalenna sual kawnga Mizo pasalthate huaisenna, inpekna leh tha thawh hriatrengna puala Ministry of Tribal Affairs kaltlanga sak museum chu Mizo leh India tana rohlu, thangtharte fuih phurtu leh zirna kawnga puitu tur a nih avangin khawvel huap pawha zahpuiawm lo tura siam a tul thu a sawi a. A hmunhma cheibawlna kawngah pawh tualto hmanruate hmang tangkaia Mizo hnam ziarang mil zawnga hma la zel turin sorkar hotute a chah.
Ropuiliani Tribal Freedom Fighters Museum huam chhungah hian Open-Air Theatre, Traditional Hut, Heritage Walk, Birsa Munda Tribal Pride Garden, Cafeteria leh Staff Quarters-te a awm a ni.