Bulgaria chhimchhaka Trakia motorway-ah chhum leivak zing nasa lutuk avanga hmun hniha lirthei insu khawmah mi 12 an thi tih Prime Minister Rumen Radev-a’n a sawi.
Health Minister Katya Ivkova-i chuan Thawhlehni khan Zimnitsa khaw bulah insutna thlengah a hmunah mi 11 an thi a, a hnuah damdawi inah mi dang pakhat a thi leh niin a sawi a. Mi 50 chuang hliam tuar an awm bawk.
Sliven region Governor Mihail Kasherov-a chuan he thil thlengah hian lirthei 70 chuang an tel niin thuthar lakhawmtute a hrilh tih Bulgarian sorkar news agency BTA chuan a tar lang.
Thuneitute chuan chhum leivak zing nasa lutuk avang hian khaw hmuh theih chin a tawi hle a, hei hi khawchhak lam hawia tlan lirtheite an insut chiam chhan niin an ngai.
Radev-a chuan Nilaini hian ram pumah sunna hman a ni dawn tih a sawi.
Lirthei insut hi Sofia panna kawngpuiah chhum zing nasa avang bawkin a thleng leh a, thuneitute chuan lirthei khalhtuten chetsualna hmasa thleng an thlir nasat avanga thleng a ni tel bawk tih an sawi niin BTA chuan a tar lang.
Trakia motorway hi Bulgaria khawthlang atanga chhak lam panna kawng niin an khawpui, Sofia atanga Black Sea vaukam thlen theihna a ni.
Kawng enkawltu hotu, Galin Kostov-a chuan chetsualna thlen chhanah kawngpui a hnawn nasat avangin lirtheite tlan chak dan nen a inmil lo niin a sawi bawk a, kawngpui hi then a nih hma khar a ni dawn tih a sawi bawk.
Yambol region Governor Georgi Chalakov-a chuan chetsualna hmasa hi zing dar 07:10 (India-a chawhma dar 10:40)-ah niin hliam tuarte hi ambulance hmangin Yambol, Sliven leh Burgas region-a damdawi inah phurh an nih thu a sawi.
Chalakov-a chuan BTA rescue team-ten kawng sira tlak dalna thenkhat chu miin chhanchhuah hna an thawh theih nan an thiat tih a sawi a. Chhum a zin nasat avang hian hliamte phurh chhuah nan helicopter pawh a hman theih loh niin a sawi.
European Commission President Ursula von der Leyen-i mikhual mektu, Prime Minister Radev-a chuan thil thleng a hriat avang hian thuthar lakhawmtute a kawm hun pawh a pawt tawi a, a hmunah hian a kal nghal a ni.