Pathianni zana Delhi-a Diwali lawm nana hal mawi an hal nasat lutuk avangin khawpui chu boruak zing chhah takin a tuam a. Zirtute chuan boruak a bawlhhlawh chhan lian ber pawh Diwali lawm nana zan lai pelh hnua hal mawi hal a nih thu an sawi.
Indian Institute of Tropical Meteorology (IITM), Pune-in data an lak khawmah Thawhtanni tuk zing dar 1:00 leh dar 9:00 inkara boruaka bawlhhlawh, PM2.5 awm zinga 71.1% chu hal mawi hal khu a ni tih an sawi.
PM2.5 an tih hi vut nawi sin tete, 2.5 micrometres leh a aia te mah zawk thlengin boruak micrograms per cubic metre (µg/m³)-a a awm zat sawina a ni.
Lirthei khu, ran ek chhe hal khu, thing hal leh vauvit khu chu hetih hun laia boruak tibawlhhlawhtu ni tho mah se a tam zawk chu thununna awm miah lova hal mawi hal chiam vang niin an sawi.
Diwali leh a hnua hal mawiin PM2.5 bawlhhlawh a thawh zat hi rin phak bakin a tam zawk niin IITM-in a zir chiannaah chuan a sawi a. Diwali hma kha chuan Delhi boruak tibawlhhlawhtu 43.4% vel a nih rin niin Inrinni zing dar 1:00 leh dar 9:00 inkara boruak tihbawlhhlawhnaa a thawh zat pawh 5.6% chauh a ni.
Delhi hi Diwali lawm zan kha chuan boruakalhthei halna hmun (gas chamber) ang mai niin mi thenkhat chuan an sawi a, khawpui chhunga boruak bawlhhlawh dan tehna, monitoring station hrang hrangah PM2.5 hi 1,000 chuang kaite pawh an awm a ni.
Station 39 awm zinga 29-ah chuan darkar khat vel thleng 1,000 a kai hlawm a, a sanna ber chu NSIT Dwarka niin 2,224 a tling tih OpenAQ-in Central Pollution Control Board (CPCB) hnena a hun lai zela thil awm dan a pekah tar lan a ni.
Diwali tuk, Thawhtanni khan Delhi hmun hrang hranga Air Quality Index (AQI) chu 400 chung lam ni deuh vekin chawhrualin 376 a ni a, hei hi ‘chhe tak’ huanga mi a ni a. Sonia Vihar, Burari Crossing leh Vivek Vihar te chu a bawlhhlawh zualna a ni.
Supreme Court chuan Diwali lai hian November 7 leh 8 khan hunbi tiam neia green hal mawi hal a phalsak a, November 9 atang khan khap vekna hman zui lehnghal a ni bawk.