Aizawl: MJA Serchhip district chuan Nilaini khan Khawzawl District Agriculture department-in Tualpui khuaa hma an laknate an tlawh.
Serchhip District Agriculture Office buatsaiha MJA member zin chhuakte hi Khawzawl DAO Lallawmzuali leh a thawhpuiten an lo dawngsawng a, department hmalaknain loneitute chu lo number pawt loa huan nghet neihtir hna an thawh mek thu an sawi a. Loneitute thlai duh thlan chintir an nih bakah hmanraw mamawh department lamin an ngaihtuahsak thin thu leh, hei hian loneitute phurna a siam sak thin tih an sawi a; nihawi tel sawr hunah zawrh chhuah paha ‘Nihawi Kût’ hman tumin ruahmanna an siam mek tih an sawi.
Hemi hnu hian MJA member-te chuan Tualpui khua tlawhin, khawtlang hruaitute leh Tung Chingtu Association hotute nen an inkawm a, nikum atanga hmalak tan a nih tawh thu leh tunah hian chhungkaw 100 chuangin Tung an enkawl mek thu an sawi a. Tung lakluh chu a chi a that tawk loh avangin a tiak nung a tlem deuh thu sawi a ni a, department lamin a tiak a thlawna pein, a enkawlna leh kum tawpa a tiak nung tha pakhat zela Rs. 50 zel pek tuma hmalak a nih thu an sawi.
MJA member-te hian Agriculture department-in tlangram loah Nihawichi leh tomato chinkawptirna hmun hmun an tlawh bawk.