Aizawl: Mizorama hmun mawite chu Mizo mipui ngeiin tlawha an pho chhuah zel chuan pawn lam atanga khualzin lo lut an pun zel dawn thu Tourism Minister Lalnghinglova Hmar chuan Zirtawpni zana Serkawn, Lungleia Leitlangpui Music Festival (LMF) 2026 kharna hunah a sawi.
Ministry of Tourism leh Mizoram Tourism Department tangkawpin Lena Stadium-a an huaihawt LMF 2026 tawp zanah thu sawiin tourism minister chuan, kum 2025 chhungin Mizoramah khualzin 8,41,322 an luh thu leh kumin 2026 September thlengin khualzin 7,37,626 an awm tawh thu a sawi a; khualzin vanglai October atanga December thla inkarah chuan Mizoram mipui zat vel khualzin an thlen beisei a nih thu a sawi.
Kumin Winter Festival chu kum dang zawng aia changtlunga buatsaih tum niin, Aizawl bakah December ni 17 leh ni 18-ah Tlaizawng Paradise, Phuaibuang-ah leh December ni 30 leh ni 31-ah ‘Sakawrhmuituai Sunset’ huaihawt a nih tur thu sawiin, Darzo khuaa kum 99 lo kalpui tawh ‘Chepa nun chan’ chawisan nan department-in theihtawpa a puih tur thu a sawi bawk.
Lunglei HPC Vice Chairman V. Malsawmtluanga, LMC Councillor-te leh sorkar official eng emaw zat telna he festival kharna hunah hian BBY Animals buatsaihin band contest leh stall 100 vel hawn a nih bakah, zaithiam hrang hrangin mipui an awi a ni.