Aizawl: Kumin August 16 zana Champhai District Jail atanga tlan chhuak mi pathum zinga pakhat, Lalthakima (26), Chawngtlai khua chu Zirtawpni tlai khan Zokhawtharah man a ni.
Thudawn danin, Myanmar rama Khawmawi khuaa in luaha khawsa mek Lalthakima hi Hualngoram Police-te nena tangkawpa man niin, man a nih hnu hian Champhai Police-te kutah hlan nghal a ni. Lalthakima hi hmeichhe naupang khuaikhem thubuai avanga kum 20 chhung lung in tang tura Court-in a chungthu a rel tawh a ni.
Hetih lai hian, a tlan chhuahpui zinga pakhat, Champhai Jail Veng mi, Lalthlamuana (22) chu September thla khan Zokhawtharah bawk man a ni tawh a; ani hi hmeichhe naupang khuaikhem thubuai pahnih nei niin a tlan chhuah lai hian a thubuai ngaihtuah mek a ni a, man a nih leh hnu hian court-in kum 20 lung in tang turin a chungthu a rel ve ve a ni.
An zinga pakhat dang, Dungtlang Police-ten hmeichhe naupang khuaikhem avanga an man leh kum 20 lung in tang tura chungthu rel tawh Vanlalzara (34) erawh tun thlengin man a la ni lo thung.