Seat hnawh khah loh a tam thin avangin Mizo zirlaiten Sainik School ngaihven se duh

Aizawl: Ram leilung fate tana seat hauhsak zaa 67 chu hnawh khah a nih ngai loh avangin Mizo zirlai tam zawkin Sainik School Chhingchhip ngaihven se an duh thu he sikul thawktute chuan Inrinni khan Aizawl Press Club-a thuthar thehdarhtute an kawmnaah an sawi.

Sainik School Chhingchhip thawktute chuan kum 2027–28 session atana Class VI leh Class IX zir turin mipa leh hmeichhe tan November ni 3 atang khan admission dil theih a nih thu an sawi a; ram leilung fate tana seat hauhsak a khah loh thin avangin state dang atangin zirlai tam tak an lo lut thin tih sawiin, sikul fee sang deuh chungchangah pawh sorkarah dil let (reimburse) theih a nih thu an sawi bawk.

Ministry of Defence hnuaia Sainik Schools Society kaihhruaina leh Central Board of Secondary Education (CBSE) hnuaia kalpui, English-medium leh awm chilh ngai (residential) Sainik School Chhingchhip hi India rama Sainik School zinga mipa leh hmeichhia luh kawpna hmasa ber niin, kum 2018 khan hmeichhe zirlai paruk an lo lut tawh a; zirlaite chu National Defence Academy (NDA) leh sipai hna sang dangte thawk thei tura thiamna, taksa leh rilru lamah kaihhruai an nih bakah, mize tha, hruaitu nihna, rinawmna leh discipline tha tak nei tura enkawl thin an ni.

Leave a Reply

error: Content is protected !!