Sri Lanka prime minister thar chuan Thawhlehni khan an rama petrol an neih sa a zawh dawn thu sawiin kum 70 chuang chhunga an ram eibar dinhmun a chhiat ber lai an tawng mek.
Television-a ram mipui hnena thuchah a sawiah Ranil Wickremesinghe chuan an ram chuan an ni tin mamawhte an chawk luh theih nan hmanhmawh takin ram dang pawisa $ maktaduai 75 an mamawh vat thu a sawi.
Central bank-in sorkar hnathawkte hlawh tur pawisa a chhut (print) dawn tih a sawi bawk.
Wickremesinghe chuan sorkar enkawl Sri Lankan Airlines pawh mi mal kutah an dah dawn niin a sawi bawk.
Thliarkar ram eibar dinhmun hi hripuiin nasa takin a tichhua a, tuialhthei man a sang a, chhiat tihhniam a ni bawk a. Ram danga an pawisa neih a tlem a, thil man nasa taka pungin ram dang atanga an chawk luh theih loh avangin damdawi, tuialhthei leh ni tin mamawh dang an tlachham nasa hle.
Khawpui ber, Colombo-a cheng, Ravindu Perera chuan Thawhtanni tuk khawvar hma atangin an chhungkuaa tuialhthei lei tur an zawn tawh thu a sawi.
“Fuel station tam takah kan kal a, a tam zawk chu a lo inkhar a. Zing dar 5.30 velah sorkar lirtheite chauh an pek thinna, Townhall-a lirthei intlar kan nang fuh ta hlauh,” tiin BBC a hrilh.
“Mi an tam lem lo va; mahse, km hnih chuanga thui intlar a ngai tho va. Zing dar 9.00 velah kan la thei ta hram a ni,” a ti.
Khawpui pawna chengte chuan an nghak rei lehzual niin a sawi a. “Tuialhthei renchem nan in atangin hna ka thawk mek a, engtikah nge kan thun khah leh theih dawn a hriat tlat loh a ni,” a ti.
Colombo-a mi nawlpuiin veivah nana an hman, auto rickshaw leh lirthei dangte chu khawpui chhung petrol station tinah thui tak an intlar vek a ni.
Tar lan fo tawh angin chawlhkar eng emaw zat lam ta atang khan eibar dinhmun an chhe lutukah sorkar mawhpuhin mipuiin an nawr nasa hle a, tharum thawhna pawh a thleng nual a, President Gotabaya Rajapaksa leh a lamhnai, sorkara a fawng chelhtute chu an nihna atanga bâng turin an kar.
Kar hmasa khan president u, Mahinda chu amah thlawptute leh sorkar duh lohtute an intihbuai hnu lawkah prime minister atangin a bâng a. Tharum thawhna thlengah mi pakua thi tawhin mi 300 chuangin hliam an tuar bawk.
Zirtawpni kal ta khan Wickremesinghe chuan an eibar dinhmun hniam mek chu ‘a that leh hmain chhiat lehzual’ a thleng dawn niin BBC a hrilh.
Prime minister pisa a luah leh hnu lawkah an rama chhung tinin ni khata vawi thum chaw ei tur an neih ngei a tiam.
Ram dangte chu suma pui tura ngennin, “Riltamna chu a thleng lo vang, ei tur chu kan zawng hmu ang,” a ti bawk.
engnge a sawi?
Wickremesinghe chuan Thawhtanni zana thu a sawiah, “Tunah hian kan petrol neih chuan ni khat chauh min daih ta a. Thla eng emaw ti chhung lo kal leh tur hi kan nuna hun khirh ber a ni dawn,” a ti.
Petrol leh diesel hi a bain India-in a thawn dawn a, “Ni reilo te hnuah chuan a ziaawm ang,” a ti.
Ningani kal taa prime minister atana ruat, Wickremesinghe chuan sorkar hnathawkte hlawh tur leh tul danga hman turin pawisa an chhut belh dawn tih a sawi bawk.
“Ka duh dan lo ang takin, sorkar hnuaia thawkte hlawh tur leh ni tin mamawh leina tur pawisa chhuttir a ngai a. Eng pawh ni se, pawisa chhut belh hian kan pawisa hlutna pawh a tihniam ngei dawn a ni,” a ti.
An ram sum dinhmun a ngheh theihna turin Sri Lankan Airlines pawh hralh tur zingah a tel tih a sawi a. March, 2021-a tawp kum liam taah airlines hian Sri Lankan rupee tluklehdingawn nga zet a hloh a ni.