Aizawl: Tun hnai ruah sur avanga Republic Venghlun, Lunglui Road-a lei khikna hmuh chu nimin tlai khan DM&R Minister Lalchamliana’n a tlawh a, chhiatrupna a thlen thulha DM&R atanga tanpuina awm theite pawh ngaihven nghal a ni tih a sawi.
Khawtlang hruaitute nena inkawmna an neihnaah Lalchamliana chuan Republic Venga leimin avanga chhiat tawk chhungkua tam tak an awm chu pawi a tih thu sawiin, vanduaina tawkte thinlung taka a tawrhpui thu a sawi.
Chhiatrupna a lo thlen thulha DM&R atanga tanpuina awm theite pawh ngaihven nghal a ni tih leh tanpuina pek tur zat hi central sorkarin inkaihruaina a siam anga pek a nih tur thu a sawi a, “In chhe tanpuina tur zat bituk a awm a, in thiah ngai thiahna senso pawh bituk awm sa angin sorkar atanga pek chhuah a ni leh dawn,” a ti.
DM&R ,inister hian Chairperson, Local Level Disaster Management Committee, Republic Veng hnenah tanpuina Rs 50,000 leh relief camp-a awmte tana ni thum chhung atan relief Rs 17,760 a hlan a, YMA hnenah thingpui lumna Rs 10,000 a pe bawk a ni.
Minister tawiawmtu, ADDMA Chairman Dr Lalhriatzuali Ralte huan Aizawl DDMA atanga hmalak theih ang angte chak taka bawhzui a nih tur thu sawiin, chhung tinten tui chhe paihna leh tuiluankawrte an vil that hle a ngai a, veng tinah Local Level Disaster Management Committee chu thuneihna sang tak nei leh dan bawhchhiate hrem theihna neiin din an nih thu leh henga mawhphurtute zawng zawngte pawh tan la thar leh turin a chah.
Nimin vek khan Aizawl Mayor Lalrinenga Sailo leh AMC hotute dangten Republic Venghlun, Lungli Road-a lei chetna hmun hi an tlawh bawk a, mayor chuan khuarel chhiatna thenkhat chu mihring siam chawp avanga thlengte a awm theih thu te, tui chhe paih leh bawlhhlawh paih mumal loin leimin a siam thei a, septic tank-te pawh uluk taka siam a tul a, mipuite pawh an fimkhur a tul thu a sawi.
Mayor hian chhiatna thleng tanpui nan hian silpauline budle khat leh Rs. 5,000 chu AMC ward 17 Councillor David Zohmangaiha leh local council hruaitute hnenah a hlan.
DM&R-in an tar lan danin helai lei che hi nikum October khan enfiah a ni tawh a, kumin July 23 atang khan a che nasa zual a, a theih ang angin chhiatna liantham pumpelh nan inthiar chhuah, ruahtui luhna lai silpouline-a khuh leh thil tul dangte tih nghal mawlh mawlh a ni.
Helai lei che avang hian chhungkaw 17-in bungrua thiar chhuakin an in an rauhsan a, chhungkaw 19 erawh bungraw la chhuak lovin an riak chhuak thung.