Aizawl: Mizoram Youth Commission leh Central Young Mizo Asossiaton chuan Mizo thalaite cement mistiri training-na tur buatsaih chungchangah nimin khan thawhhona thuthlung an ziak.
MYC Conference Hall-a thuthlung ziahnaah hian MYC aiawhin Dr. Vanlaltanpuia, MLA & Chairman, MYC-in hming a ziak a, CYMA aiawhin R.Lalngheta, President CYMA-in hming a ziak a ni.
MYC chuan CYMA hnenah Rs nuai 10.65 pein CYMA-a Training & Youth Affairs Sub-Committee-in Mizo thalaite tan cement mistiri training an buatsaih dawn a ni.
Thuthlung ziah inkhawmah MYC Chairman Dr. Vanlaltanpuia chuan MYC-in Mizo thalaite hmasawnna leh eizawnna an hmuh theihna tura hma a lak mek thu sawiin, tun hnaia Super IAS 40 programe hnuaia IAS Coaching Delhi-a full sponsorship pea kal tura a thlante pawh August 4, 6 leh 9, 2022 khian Delhi an pan dawn tih a sawi a. CYMA pawh sorkarin thalaite hmasawnna kawnga hma a laknaah thawhpui turin a sawm nghal.
He thuthlung ziah inkhawmah hian MYC hotute bakah CYMA office bearer-te leh CYMA hnuaia Training & Youth Affairs Sub-Commitee OB-te an tel a ni.