Thailand chhimchhak lam, Chonburi province-a zan lama intihhlimna hmun, nightclub kangah mi 13 vel an thi a, mi dang 41-in hliam an tuar bawk.
Kangmei hi an ram sanaa Zirtawpni zing dar 1:00 (India-a Ningani zan dar 11:30) vela Sattahip district-a Mountain B nightspot-a chhuak a ni tih police chuan an sawi.
Online-a thil thleng video thehdarhah chuan au te tengtung chungin miin club hi an tlanchhiatsan a, thenkhat chu an thawmhnaw a la kang bawk.
Chhanchhuah hna thawktute chuan a banga thil kang duh chi hman chuan mei hi a timankai chakin a kang na zual niin an sawi.
Bangkok chhim lam km 150 vela hla Chonburi-a kangmei chhuahna club hi chhawng khat chauh, sq metre 4,800 vela zau a ni.
Kangthelhtute chuan mei thunun turin darkar hnih chuang an bei niin tual chhung chanchinbute chuan an tar lang.
Thi hmeichhia pali leh mipa pakuate hi a tam zawk chu club chhuahna bul mai leh bual ina an ruang chhar an ni hlawm a. DJ booth bula chhar an awm bawk.
Thite hi an vaiin Thai vek nia hriat an ni.
Kangmei chhuah chhan tak hi hriat a la ni lo va, Sawang Rojanathammasathan Rescue Foundation atanga thuneitu kalte chuan club bang atana an hman chu thil kang duh tak a nei a, hei hian rang takin mei hi a mankai ta nia an ngaih thu an sawi.
Thai Prime Minister Prayuth Chan-ocha chuan Zirtawpni khan thi chhungte chuan thuneitute hnen atangin puihna an dawn vek tur thu a sawi a. An ram chhunga intihhlimna hmunte chuan rikrum a thlen palha chhuahna tur a nei tha em tih leh heng hmunah hian himna tura dan zam zawm a ni em tih endik that vek a nih tur thu a sawi.