Indian nurse, chawimawina an hlan tur dawng tura thlawhnaa a zinkawngah a chuanpui nunna a chhanhim.
Geetha P-i hi Kerala-a mi niin tun hnaia Delhi-a nurse thawk thate hnena chawimawina sang, Florence Nightingale award dawng tura zin a ni.
Thlawhna an chhuah atanga minute 30 vel lekah cabin crew chuan damdawi thiam an awm leh awm loh a zawt a. Kashmir-a awm India sipai, Suman-a chu a thutnaah chau thutin a marphu an hmu lo a ni.
“CPR (Cardiopulmonary Resuscitation) ka ti nghal,” tiin Geetha-i chuan a sawi.
“Hetiang hian damdawi ina kan thawhpui a awm tawh a, CPR tiin cardiac intensive care unit-ah kan la lut nghal a. Ani kha chu damdawi inah a ni a, tun tum erawh thlawhna a ni a, a dan a dang ta deuh a ni,” a ti.
CPR a tih hnuah hian a marphu pawh a awm zui leh ta thuai a ni.
Crew-in IV fluid um hnih an lo kawl a, thlawhnaa chuang ve doctor, Premkumar chuan cannula a tihsak bawk.
“Darkar chanve a liam leh chuan Suman-a pawhin thil a ei leh thei nghal a. Zinkawng tluanin thlawhna hnung lamah ka thutpui tluan ta a ni,” a ti.
Delhi-a an tum veleh medical team-in Suman-a chu damdawi in an panpui nghal a, enkawl mek a la ni.
World Health Organization officer, thlawhnaa chuang ve tho, Dr Mohammed Asheel chuan a tirah chuan Geeta-i chu Suman-a chhungte a nih vanga rang taka buaipui emaw a tih thu a sawi.
“Hmeichhe pakhat leh doctor pathumin damlo an buaipui chu ka hmu a, pakhat chu emergency care specialist a ni nghe nghe a, an zavaiin a thutnaah rang takin an tlan nghal a ni,” a ti.
An tum hnuah Dr Asheel hian Geetha-i hi biain kum 2019 pawh khan Kerala sorkarin ‘Best Nurse’ chawimawina an lo hlan tawh tih a hre zui ta zel tih a sawi.
“Thil thleng palh danglam tak si a ni a, Delhi-ah president-in Florence Nightingale award a hlan tur dawng turin a kal a, a kalkawngah vansangah mi nunna a chhan leh bawk a ni,” tiin Dr Asheel chuan a sawi.
Geetha-i hian kum 2020 daih tawh khan chawimawina hi dawng tura thlan a ni tawh a; mahse, Covid avangin ral atanga inhlan a ni a. Delhi-ah hian President Droupadi Murmu-i hnenah a taka hlan loh zawng zawngte hlan turin an kal khawm a ni.
A chawimawina dawna thuziakah chuan kum 2018-a Keral-a Nipah virus a len laia a thawh that avanga hlan a nih thu a inziak.
Kum 2018 leh 2019-a tui lian nasa tak an tawrh tum pawh khan Geeta-i hi disaster management operation-ah a thawhhlawk hle a, Covid-19 len lai pawhin a thawkrim hle bawk.