Meghalaya chu African Swine Fever (ASF) chuan a la kiansan lo va, khaw thenkhat atangin he natna avanga thi ni ngeia ngaih vawk thi a la awm nual.
“Ri-Bhoi district-a khaw thenkhat atangin ASF vang ni ngeia ngaih vawk thi kan dawng nual a. Kan field officer-te a sample la turin an kal dawn a, North Eastern Regional Disease Diagnostic Laboratory, Khanapara-ah endik tura thawn a ni ang,” tiin Animal Husbandry & Veterinary Department Assistant Director (Disease Investigation), Dr D.I. Kjam chuan Thawhlehni khan a sawi.
Kar liam ta lamah pawh rinhlelh sample eng emaw zat an thawn tih Kjam chuan a sawi a. “Mahse, heng sample kan thawnte hi hri kai an lo ni lo hlauh zel a, hei hian ziaawm lam kan pan tih a tilang,” a ti.
Sorkar chuan district pakhat atanga a danga vawk phurh chhuah leh luh chu a la khap reng tih a sawi a. “AFS dah zel tur venna hi kan la kalpui reng a, hri hi kan thunun thei ngei ang tih ka ring,” tiin Animal Husbandry & Veterinary Department Assistant Director (Disease Investigation) hian a sawi bawk.
Dr Kjam chuan an state chu ASF lakah an fihlim tia puan theih hun chu an sample endik zawng zawngte a negative atanga ni 45-ah chauh a nih tur thu a sawi bawk.