Bangladesh ram chhung, Chittagong Hill Tracks-a Bangladesh sipai leh Kuki Chin National Army-te inbeihna avangin Bangladesh-a awm Zohnahthlak mi 300 dawn chu an sahimna zawngin Lawngtlai district chhungah an tlan lut.
Thudawn danin Chittagong Hill Tracks-a Zohnahthlakten state hran ngiata an beihnaa an din, Kuki Chin National Army (KNA) chu tunlai hian Bangladesh sipai leh Arakan Army tangkawpten an beihrawn mek a, hemi avang hian Chittagong Hill Tracks chhunga khaw hrang hrang – Thingdawlte, Theihkhiang, Salopi, Sunsawng, Phainuam, Cheihkhiang leh Rum-a chengte chuan an sahimna zawngin nimin khan Mizoram an pan a, ramria duty-ten Border Security Force (BSF)-te ruahmannain Parva piah Sameinasora khuaah awmtir mek an ni a, Tuichawng Group YMA hruaituten an sawi danin, nimin tlai thlenga Sameinasora khuaa lut tawhte hi mi 274 an tling tawh a ni.
Tuichawng Group YMA hruaitute chuan raltlante hi biak in leh primary school-ah awmtir an ni a, Parva III khawtlang hruaituten an ei leh in turte an buatsaihsak tih leh an vai hian Zohnathlak ‘Bawm’ hnam vek an nih thu an sawi a, raltlante hi BSF-te hian an veng deuh reng tih leh tuna an awm dan ang awmtir reng chu a tha loa an hriat thu leh Parva III lamah hruai luh theih an duh thu an sawi a, raltlan zingah hian taksa lama harsatna neite pawh an awm a, BSF-ten an ven tlat avangin an duh angin an buaipui hlei thei lo tih an sawi.
Hemi chungchangah hian Mizo Students’ Union (MSU) chuan thuchhuah siamin Zohnahthlak unau Bangladesh-a cheng mek, an sahimna zawnga Mizorama luh tumte chu BSF -ten an manganna hriatthiampui loin, nunau leh kum upa zawkte pawh thliar loin an lo dang vek tih leh BSF chet dan chu an dem hle tih an sawi a, an himna ngaihtuahsak thuai tur leh an harsatna a rang thei ang ber a chin fel a nih theih nana hma la turin Mizoram sawrkar an phut tih an tar lang bawk.