Aizawl FC in tun season I-League a an hnehna hmasa ber an chang a. Sudeva Delhi lakah 2-1 in an chak.
Thawhtanni tlaiah Rajiv Gandhi Stadium-ah Aizawl FC hian an mikhualte lakah hian an mamawh tak result an nei a. Second half-ah Matias Veron chuan chakna goal a khung.
Mahni mualah vek la inkhelin an match hmasa pahnihah draw leh tlawm result an nei tawh a, hei vang hian point thum an mamawh hle.
Sudeva hi goal khung hmasa zawkah tangin minute 11-naah Seilenthang Lotjem chuan goal a khung a. Ball chang tam zawk Sudeva in goal an khung hmasa.
Hma erawh an hruai rei lo. MInute 26-naah insiamtha Aizawl FC tan Lalchhawnkima chuan goal a khung a. Corner atang Henry Kisseka goal khung tur a zawna dan a nih hnuah Kimkima’n a remchang neih chu goal-ah a khung.
Second half-ah pawh Aizawl FC an langsar zawk a. Minute 64-naah Kisseka leh R. Ramdinthara te inkawpin tlarhnung thiatin Matias Veron tan chance tha an siam a. Argentine midfielder in goal-ah chiang takin a khung.
Aizawl FC hian zanin a MPL semi-final an khelh hnuah RoundGlass Punjab an tum leh ang.