PC party-in Mizoram sorkarin electric bill tihpun tuma JERC-a rawtna a siam duhlohna nimin khan an thlen.
PC party chuan “Mizoram sorkara Power & Electricity department-in kum 2022-23 a mipuite hnena electric power pekna senso atan Rs. vbc 762.42 mamawh tura inchhuta hemi behchhana nasa taka bill tipung tura JERC-a rawtna an thlen hi mipuite sum rawk tumna lian takah kan ngai” an ti a. He rawtna hi an duh loh thu leh an dodal thu an sawi.
P&E department-in JERC-a an dilna kalhmangah corporation anga kal ni mai awmin an inlantir niin PC party chuan an sawi a. “Department-a thawktute hlawh leh thil dang hrang hrang, mipui pawisa (public money) atanga sorkarin a pek tur te pawh an senso tura an chhut tel vek mai hi a dik thei lovin, felhlel taka hmalak naah kan ngai” an ti.
PC party chuan “Mipui pawisa atanga sorkarin a pek tur leh power subsidy atana sorkarin mipui pawisa a pek tur te nena chhut kawp chuan electric bill chu a pun a ngai lo ni mai lovin tihtlem theih zawk a ni” an ti a. Hmun dang atanga power leina man tihpun a awm chuang lo nia a lan thu leh heti chunga bill tihpun tumna chu an duh loh thu an sawi.
“Electricity act kan hman mek hian power semdarh hna chu corporation kuta dah turin ti mahse, Mizoram sorkar chuan hre reng chungin a la tihlawhtling lova. A tih tur tihlawhtling si lovin mipui phurrit belhchhah turin diklo takin, hre reng chungin, sorkar chuan corporation te tihdan tura thil tiin kum engemawzat chhung bill a pun chho tawh a ni” PC party chuan an ti a. Electricity act bawhchhiatna a awm avangin section 19 of Electricity act, 2003 behchhana hma la a, power sem darh hna department kuta awm chu titawp turin PC party chuan JERC-ah ngenna an thlen tel tih an sawi bawk.