Agriculture department chuan Mizoram district pariata fertilizer dealer-te chanpual theuh allotment order tichhuakin, department lamin fertilizer dealer-te chu siam tura an tihna hmunah retail dealer siam vek turin a hriattir.
Mizoram chhungah hian fertilizer dealer mi 18 awmin, Mizoram fertilizer dealer hrang hrangte chu district tina agriculture office thawktuten an bial theuha kut hnathawktuten an mamawh tawk ang an thehluh atangin directorate-in an pe chhuak nia thu dawn a ni.
Kumin chhung atan hian urea bikah metric ton 1,299.96 pek chhuah an ni a; DAP (IPL) bikah metric ton 110 pek chhuah a ni a. Hei bakah hian MOP (IPL) matric ton 60 allotment pek chhuah a ni.
Thudawn danin, fertilizer hi ration buhfai ang bawka subsidize-a pek chhuah a ni a, control item a ni bawk.
Fertilizer chungchangah hian dealer leh kut hnathawktute inkar a hla nia sorkarin an hriat avang leh dealer-ten urea hi blacker-ho hnenah an hralh thin nia hriat a nih avangin Fertilizer Retail Dealer siam vek turin dealer-te hriattir an ni a. District tina Fertilizer Inspector atana ruatte chu district chhunga khaw tê zawkte khaikhawm thei khaw lian zualah retail dealer an siam leh siam loh endik vek turin tun hnai khan hriattirna tihchhuah a ni bawk.