Mizoram sorkar in tunhnaia police hna a lakah dik lo taka thilti leh inhnamhnawih mi 10 an man tawh thu an sawi a, a dang chhui lai mek an la neiin an sawi bawk.
State kan nih hnu pawhin hna hrang hrang lak a lo ni tawh a, langtlang taka lak leh a ruk deuha lak pawh an lo awm nuk tawh thin. Dan dik taka hna laka tlingte hi tutemahin an thik lo a, an sawizui peih thin lo. Chutihrual erawh chuan dan pel deuh hleka thil ti duh an lo awm leh thin hi a pawi a, thenkhat phei chuan sum hmuh nan an lo hmang hial thin nia sawi a la ni leh zel!
Kan ramah hian sorkar hrang hrang kan lo hrawn tawh thin a, a hotu sang lam leh a thuneitu chin chuan an awm chhung na na na chuan dan dik taka hna lakte pawh hi kalpui an duh thin ngei ang, an hming a chhiat hma dawn em avangin. Mahse, chutiang ni ve lem lo, a sum um zawng leh a hnu lama therhlo ilo beisei nei thei dawna inhriatna avanga dan pel deuh hleka che duh an awm thin nia lang hi a pawi a, fimkhur a ngai hle.
Tuna police hnalak chungchangah pawh hian thil dik lo titute chu an phutawk hremna pek ngei ni se la, a inhnamhnawih dang an lo la awm a nih pawhin zawnchhuaha hremna pek ngei ni hlawm teh se.
Sorkar pawhin a department hrang hrangah hnalak a la nei chho zel ang a, chutih hunah chuan dan pela thilti duh pawh an rawn inlar leh ngei pawh a ni thei. Heng mite hi ram hmelma an ni a, man a, hremna na zawk pek zel hi i tum teh ang u.