- Mahmuaka Chhakchhuak
Assembly House–a session neih mekah ram hruaitute’n ram mipuite tan rorelna pawimawh tak an neih mek laiin Vairengte – Sairang inkar kawngpui four lane-a siamna tur chungchang sawi rik a ni a, inhnialna pawh a chawkchhuak hial bawk a ni. Pakhatin zangnadawmna hi process kal lai mek a nih avangin zangnadawmna la tur zat hriat ala ni lo a tih laiin Pakhatin zangnadawmna la tur hi tihfel vek tawh, gazette-ah pawh chuang tawh a nih thu a rawn sawi bawk a. Hemi avang hian Office lama thawktute pawh transfer hial nia sawi a ni nghe nghe. House Leader ber pawhin Vairengte – Sairang four lane turah hian fello lai ala awm thu sawiin NHIDLC chuan Mualkhang atanga kawng hluiah Tlawng lui kamah Sairang lam panin siam an tum a ni. Hei hi tha kan ti lo a, tuna kawng awm sa pawh hi leimin leh thil dang vangin enkawl hleih theih a ni lo a ti bawkin a mual muala tawlh pawh a awm theih tur thu a sawi. Hei vang hian NHIDCL duh dana siam a nih a, lei tawlh avanga buaina a awm leh chuan thangtharte dem an hlawh tur thu sawi bawkin Rel kawng a hnaih lutuk bakah, gas bottling plant pawh a buai phah vek dawn tiin a sawi bawk.
Hetiang hi House chhunga kan ram hruaitute tawngkam a ni a, hetia ngaih mai chuan a ni mai awm mang e tih tur a niin an sawi ang hi alo tha zawk mai awm mang e a tih theih. Nimahsela hei hi ngun taka ngaihtuah chuan hemiin harsatna a thlen theih turte hi a lian tham viau thei dawnin a hriat thung. A hmasa berah chuan railway chhak lam, Aizawl ep lamah kawng hi sial a nih chuan lui kam vela eizawngtute tan chhawrna a awm phak dawn lo a. Chhungkaw tam takin eizawnnaah harsatna an tawh phah ngei dawnin a lang. Vanglaini 5th February 2022 chhuakah Editorialah pawh Vairengte leh Sairang inkar kawngpui NH-06 leh NH-306 zauh hna Ministry of Road Transport & Highways (MoRTH) hnuaia thawh tur chu zangnadawmna tur sum dil a tam lutuk avangin hna \an theih a nih loh thu kan hmu a.
Tuna hna \an theih loh chhan piah lamah pawh hian he kawngpui laih turah hian inhnialna tam tak a lo chhuak tawh a. VC pass siam dan te, Periodic Patta pek chhuah danah te leh House Pass leh LSC siam dan te thlengin sawi neuh neuh a tam hle. Tun hnaiah helai hmuna kawngpuiin a paltlang tur ram hralh leh lei pawh a tam hle tih zep rual a ni lo a, kawngpui paltlang tur ram hre thei fâl deuh leh a lei huai deuhte thlengin an awm a, a zialo hle a ni. Heng thilte hi sorkarin a duh chuan huaisen takin a chingfel thei tih a chian laiin a huai ngam lo \hin a, ‘zawlbuka e tang \heuh \heuh’ tih \awngkam hman ngai tur ang maia zangnadawmna pek tur a awma kan sorkar a huai ngam ngai lo hi a pawi hle. Dik tak chuan thil hre chiangtute hi a tawpa mi hminga hlawkna teltu an ni leh mai \hin a, chu chu he kawngpui laih turah pawh hian a thleng lo ang tih a sawi theih loh. Kawng laih tur ruahmanna awm tirh a\anga thil kal dan thlir hian a hun taka hna an \an thei mai lo pawh hi thil mak tak a ni vak ta lo e tiin kan hmu bawk a.
Kan sorkar hruaitute hian NHIDCL duh dana siam a nih a, lei tawlh avanga buaina a awm leh chuan thangtharte dem an hlawh tur thu sawi bawkin rel kawng a hnaih lutuk bakah, gas bottling plant pawh a buai phah vek dawn tiin a sawite hi ngun taka ngaihtuahna kan neih a tul phahna tur a niin a phenah thil dang a awm zawk em ni a tih theih bawk a. Lei tawlh lam hi chuan khuarel thil a niin sawi lawk theih loh thil a ni nain kum kha leh chenah pawh leitawlh hi hriat a ni lo a, tun ataka lei tawlh hi a awm thut a rinawm lem loh viau. NHIDLC duh dan anga kawngpui hi sial a nih pawhin lei tawlh leh lei min chu a awm phah kher lo ang tihna erawh a ni chuang lo a, chumi hlauhna avanga ruahmanna tihdanglam chu a dik kher dawn em ni le? Tin, Rel kawng hnaih lutuk tih leh Gas botting plant pawh buai phah tura ngaihna hi chu chhuanlam tlingah a ngaih theih chiah loh. Vanglaini lam pawhin March 6&7, 2022 ah Editorial ah bawk hemi chungchang hi rawn sawi lehin zangnadawmna vanga harsatna kan tawh thin thu rawn sawiin Vairengte – Sairang inkar kawngpui four lane-a siam turah pawh hian zangnadawmna kan buaipui viau ni awmin a rawn sawiin chumi avang chuan harsatna kan tawk niin a rawn sawi a, hei hi tak tak a nih chuan thil zahthlak tak a niin a pawi thei hlein a rinawm.
NH lam hian kawng thar diai hi Railway chhak lama sial tur chuan hnawhkhah tur a tam a, hemi atana sum leh pai sen hi a sang dawn lutuk a, Existing road widening hi a cost nasa takin a hniam a tih vanga helam hi hawi nia sawi a ni a. Tin, Environment lama a nghawng theih turte pawh hi an thlir ngei pawh a rinawm a, tuna zoram hmun hrang hranga kan kawngpui laih mekte’n ram ngaw a tihchhiat tawhte mit ngeia kan hmuh hi chuan Vairengte – Sairang kawngpui la sial leh turah hi chuan thing leh maute tichhe lo hram tura hmalakna awm thei sela a duhawm hle a ni. Tlawng lui ngei pawhin harsatna a tawk tawhin a bik takin Aizawl leh Lunglei khawpuite chuan tui in tur pawh harsatna kan lo tawk tawh bawk a ni tih mitinin kan hre vek tawh a, chutiang hmabaka awm leh tura ngaihtuah hi chuan kan ram hruaitute thinlungah pawh environment humhalh zawnga hmalakna a awm theihna tura ram leilung hmangaihna an neih tel hi a duhawm takzet a ni.
Hei lo hi ram kan nei lo a, hei lo hi kan tu leh fate tan pawh chenna tur ram kan neih loh avangin he kan ram hi tuna mite hian hmangaih taka kan enkawl a pawimawh hle mai a, tuna four lane-a kawngpui ruahmanna awm pawh hi thil tha leh tangkai tak tur pawh a ni ngei bawk ang a, chutih ruala kan ramin hemi avanga thlaler ram ang maia kan chantir phah a nih chuan a pawi ngawt ang. Chuvangin ram hruaitute pawhin hmangaihna thinlung nei chungin hmasawnna hi kalpui sela tih hi kan ngenna a ni.