Aizawl: Aizawla Chawnpui veng huam chhung, Ebenezer Hospital piah kawng chhak lama in pathum chu a neitu leh a luahtute chu hun eng emaw chen court-in an thubuai ngaihtuah hnuah Thawhtanni khan Senior Civil Judge, Aizawl District thupek anga tihchhiat a ni.
Hmun inchuh hian hun eng emaw chen chu buaina a lo awm tawh a. Buainaah hian high court leh district court-ah C. Zarzoliana, Dawrpui, Aizawl chuan hnehna a lo chang tawh a. A awmte hi court bakah Land Revenue & Settlement Department pawhin chhuak turin an lo ti fo tawh tih Chawnpui Local Council atanga chuan an sawi.
Court thuchhuak avang hian local council hian tum li vel chhuak tura an hrilh tawh a, revenue department pawhin chhuahtir tur hian tum hnih vel local council hi an ti tawh nia sawi a ni.
In pathum thiahna ram bakah hian kawngpui thlang lam pawh C. Zarzoliana ram a ni a, kawngpui a tlang hnuah a chhaka in satute hian awmhmun an lo khuar ta mai niin local council chuan an sawi.
Thupek a tihchhuahah Civil Judge (Senior Division) II chuan he hmun atanga chhuak tura khingtu bakah Deputy Superintendent of Police, Executive Magistrate leh local council chuan July 2, 2006 khan a luahtute hi chhuak turin an hrilh a; mahse, ram luahtute hi an chhuah duh loh avangin hmalak a ngai tih a tar lang.
A khingtu hi helai hmuna building leh thil dang ding laite tihchhiat phalsak a ni a, July 13, 2026-ah Superintendant of Police, Aizawl leh Officer-In-Charge, Vaivakawn Police te chu tawimawm turin a ti a. Executive Magistrate, Aizawl chu he lai hmuna in dingte tihchhiat a nih dan July 15, 2026 hmaa hriattir turin a ti a. Deputy Commissioner, Aizawl District chu July 13, 2026-a thil thleng hi lo buaipui turin a hriattir bawk a ni.