P&E Minister F Rodingliana hovin a office chamber-ah Aizawl Power Circle hnuaia sub-division pakua a thawktu JE chin chung lamte nen Aizawla power supply tha zawka pek dan tur inrawn a ni a, hma lak nghal theihte tih nghal niin ruahmanna siam a ni a. Minister chuan field-a thawktute atang ngeia harsatna awmte ngaihthlak a duh avanga hetiah hi koh a ni tih a sawi.
Division hrang hranga thawkte chuan harsatna leh a siam that dan tur bakah an area theuhva power supply khaihlak lova pek theih nana rawtna an neihte an thlen.
Kalkhawmte hi a inchhawkin sawihopui an ni a, minister hian harsatna leh rawtna an neihte sawi tura sawmin field-a thawktute atang ngeia ngaihthlak a duh avanga he inrawnkhawmna hi neih a nih thu a sawi.
Thawktute thu thlen atangin hmalak zui dan tur ruahmanna siam nghal a ni a. Heng zingah chuan bungraw lei ngai leh tihbelh ngaite ngaihtuahin quality tha zawk leia line pawh that ngai awmte pawh division tinah hma la nghal tura inhriattir nghal a ni a. Distribution transformer lianin zau tak a chawm thin tihzima tê zawk pahnih dah belha chawm rel a ni.
Field staff-te atanga transformer dah belh ngai report thehluhte hmalak nghal dan tur rel a ni bawk.
11 kV line thui lutuk, line chhiata thim zau lutuk tihtlem nan leh a that lohna lai hmuh awlsam nan a theihnaah then darhin a theih lohte pawh a karah load break switch dah te, 11 kV line Vacuum Circuit Breaker (VCB) a remchang laia vuah te an rel.
Aizawl chawmtu sub-station phurrit lutuk tihzangkhai nan sorkar atanga phalna hmuh tawh, Lammuala sub-station thar din chu a rang lama tihhlawhtlin dan tur dap a ni bawk ang.
Duty tur mamamawh tihtlem nan sub-station-te computerised dan ngaihtuah bakah distribution transformer tina power lut leh chhuak chhinchhiah nan in-coming leh out-going meter vuah vek tura hmalak tum a ni a, hei hi transmission loss tihtlem nan leh sorkar sum hmuh tihpun nan a rang lama hmalak tur a ni.
Distribution transformer-a fel lo hriat chhuah hma theihna tur khawl vuah tura hmalak tum a ni bawk.
Electric hrui hlui thlak ngaite en fela a rang lama report siam turin sub-division tin hriattir an ni.
Meeting-a thu rel zingah shutdown tihtlem nan a hrang hranga shutdown lovin repair & maintenance avanga shutdown ngaite a hma lam kar hniha in-report-a a ruala shutdown dan tur ruahmanna siam a ni.
F Rodingliana hian Aizawl Power Circle bakah circle hrang hrangte hetiang meeting hi neihpui vek a nih tur thu sawiin thawktu indaih loh avanga field staff-te hahzia a hriatpui thu sawiin ni khata duty tur shift li-a then thin pawh a theih loh avangin an rimtawng hle a, mipui rawngbawlna pawimawh tak a nihzia hriaa thahnemngai taka thawk zel turin thawktute chu a chah.
Inrawnkhawmna hi thla ruk danah neih thin rel a ni a, thawktute chuan hetiang hun hi buatsaih a la nih ngai loh thu tar langin Aizawla power supply tha zawk pek kawngah awmzia thui tak a neih ngei an beisei tih an sawi a ni.