Aizawl: Nakkum February leh March chhung a neih tur 39th National Games-ah Mizoramin weightlifting discipline thleng tura sawmna a dawn chungchang chu Thawhlehni khan Sports Minister Lalnghinglova Hmar hovin a pisa-ah department leh association hotuten an sawi ho.
39th National Games hi Meghalaya-in a thleng dawn a, hmarchhak state hrang hrangte chu discipline pakhat theuh thleng tura beisei an nih angin Mizoram hian Weightlifting thleng tura sawmna hi a dawng a ni.
Thutkhawmah hian Lalnghinglova Hmar hian Meghalaya Sports Minister leh Northeast Sports hotute pawh a hmunah be pawp nghalin, Mizoramin he infiamna hi a thlen dawn a nih chuan sum inruahman dan leh hmunhma ruahman zui dan turte an sawiho a. Ministry lam atangin thu chiang zawk ngaihchan mek niin tun dinhmunah thutlukna felfai siam theih a la ni rih lo a, mumal zawka inbiakna leh inbuatsaihna kalpui chhoh zel tum a ni.
Lalnghinglova Hmar chuan he infiamna thleng tura Mizoram Weightlifting Association te inbuatsaihna leh thahnemngaihna chungah lawmthu a sawi a, Mizo thalaite tana kawng zau zawk a inhawn zel theih nan sorkarin theihtawp a chhuah zel tur thu a sawi bawk.
He thutkhawmah hian Sports & Youth Services department, Mizoram State Sports Council, Mizoram Weightlifting Association leh a kaihhnawih department hrang hrang hotute an tel a ni.