Aizawl: Social Welfare Department leh Central YMA hruaitute chuan Thawhlehni khan Social Welfare Secretary Lalzarmawii kaihhruaiin Mizoram pum huapa ruihhlo dona inzirtirna — National Action Plan for Drugs Demand Reduction (NAPDDR) scheme hnuaia Awareness & Capacity Building Program kalpui dan tur chungchang ruahmanna an sawi ho.
Central YMA hian he beihpui thlakna atan hian Ministry of Social Justice & Empowerment (MoSJE) atangin sum first instalment sanction fel tawh a dawng dawn a, Mizoram khaw 700 chuang tuam chhuah tura ruahman a ni.
An inkawmnaah hian Social Welfare Secretary Lalzarmawii chuan ram leh hnam mamawh em em ruihhlo inzirtirna atana sorkar laipui atanga sum thahnem tham tak Central YMA ten an dawng mai tur chu lawmawm a tih thu a sawi a. Central YMA hruaitute chu he sum hi tangkai tak leh awmze nei taka hmang tura chahin, sorkar laipui kaihhruaina te tha taka zawm chunga thawh chhunzawm zel a beisei thu a sawi.
Social Welfare Director Vivek Kumar Tripathi pawhin Central YMA hmalakna turah hian department lamin kawng engkima puihbawm leh mamawhna an neih apianga puih zel an huam thu a sawi bawk.
Central YMA hruaitute chuan YMA kumpuan ‘Ruihhlo Do’ kawnga hmalakna tur sum an dawng mai tur chu lawmawm an tih thu sawiin, tangkai leh daihzai taka hman ngei an tum thu an sawi.
He inzirtirna hi State Level, District Level leh Village Level-a kalpui tur a ni a; Master Trainer-te inruatin Standardised Training Module siam a ni ang.