Aizawl: R. Dengthuama Hall-a Mizoram Muaythai Association bultuma neih, North East Regional Muaythai Championship 2026 chu Ningani khan kharna inkhawm buatsaih niin Chief Minister Lalduhoma’n a hmanpui.
Chief minister chuan muaythai chu kut inthlaka infiamna (contact sports) hlauhawm ber pawl leh tunlai khawvela lar ber pawl a ni a. Olympic sports discipline la ni chiah lo mah se eizawnna tlak infiamna a ni tawh tih sawiin “Mizo tlangval, Nazareth Lalthazuala pawhin ONE Championship-ah contract tha tawk tak a nei tawh a ni,” a ti.
Hetiang infiamna hi Mizote khelh chi tak a ni tih leh muaythaiah kher lo pawh contact sports dangah India aiawhin Mizo thalaite an feh chhuak reng a, lawmman ropui tak tak an rawn hawn thin niin a sawi a, “Theihna kan neihna lama nasa taka kal hi a finthlak a ni,” a ti.
Hmarchhaka fighter kalkhawmte chu nasa zawkin lo inbuatsaih turin chief minister chuan a fuih . “Sum leh pai lakluhna hnarah leh kan ram leh hnam chawimawi nan lo hmang ang che u,” a ti.
“Infiamna hi kan inkara inpawhna tha min thlentu a ni bawk a, he NE Regional Championship pawh hian hmarchhak state hrang hrangte inunauna a tinghet zual dawn a ni,” tiin infiammi kalkhawmte chu duhsakna a hlan a ni.
Lalmuanpuia Punte, Adviser to CM pawhin thu sawiin muaythai infiamnaah hian Mizoten foreign-ah medal 16 an hlawh chhuak tawh tih sawiin “Kan thalaite khelh chi tak a ni tih hi a chiang a. Lo tang sauh sauh ula, hlawhtlinna tam zawk hmuh tumin lo bei zel ula ka duh hle a ni,” a ti.
Gavin Miguel Mylliem, MLA, Sohra, Meghalaya leh Ram Choudhary, Secretary General, United Muaythai Association of India pawhin thu a sawi bawk a ni.
NE Regional Muaythai Championship-ah hian hmarchhak state an kal kim a, player 350 an fuankhawm a, intihsiakna huang 100-ah inelna neih niin a pum puiah Mizoram chu pakhatna a ni a ni a. Meghalaya leh Tripura team-in an dawt.