Aizawl: MZP Assembly vawi 70-na chu Darkhawpui Rûn, Darlawn-ah Nilaini zan khan hawnna leh palai lawmna inkhawma tan a ni a, Home Minister K. Sapdanga’n a hmanpui.
Khuallian chuan India state thenkhatah MZP ang chi zirlai pawl hi an awm nual a, a tlangpuiin political party sponsor an ni hlawm tih sawiin, “MZP a danglamna chu chutianga sponsore a ni ve lo a, sorkar nena tha taka thawk ho tur leh a tul hunah chuan sorkar pawh huaisen taka thurawn pe thintu a ni a. Eng issue-ah pawh hian rilru fim tak put a tha a, huai chu tha viau mah se, rum kher a tul lo,” a ti.
Zirlaiten hnam an vei dan huang an zauh a ngai tih sawiin, “State pawna hmun pawimawh hrang hrang tlawh leh dawr a ngaih chang hian Mizoram mi leh sa kan tlem a, Mizoram sorkar hmun pawimawhah ngei pawh Mizo awm tur IAS, IPS kan awm mang tawh lo a, a tuimite chu All India Service-ah leh Central Service-ah luh tum sauh sauh tum tur a ni,” a ti.
Faina chungchang sawiin, “Fai hi changkang a, changkanna teh fung hmasa ber a ni, a pawimawh viau bawk,” a ti a. India-a state khawpui zingah Aizawl chu fai tehnaah pakuana a ni tih a sawi a, “A lawmawm viau rualin hmasawn zel tur kan ni a, keini aia khawpui fai zawk pariat an la awm a, fai ber turin a let riata tan kan lak a la ngai,” a ti.
Inkhawmah hian MZP President Dr. C. Lalremruata pawhin thu sawiin “MZP chu kum 1935-a din niin rambuai chu pawl pawhin a tuar a, a chak lo chho hle a, kum 1993-ah din thar niin tunah hian MZP hi kum 90 lai kan lo tling ve ta a ni,” a ti.
Zirlai pawla inhmangte chu fing bik, fel bik an nih lo nia sawiin chet fuh loh changte pawh an nei tawh thin tih a sawi a, “Amaherawhchu ram leh hnamin chhan a ngaih apiangin mipuiten ‘khawnge MZP a awm?’ an ti a, mipuiin min auh hmain kan lo che chhuak fo tawh thin, Kan lo che har deuh a nih pawhin mipuite beiseina hriain he pawl hi a che chhuak fo thin a ni,” a ti.
Khuallian hian MZP Chanchinbu Special Issue, MZP Assembly atana buatsaih a tlangzarh a. Assembly hi Zirtawpni zanah a tiak ang.