Bank hnathawktu pawl, United Forum of Bank Unions (UFBU) bultumin Thawhtanni (September 28) atanga Nilaini (September 30) thleng hian ram pum huapin ni thum chhung nawrh huaihawt tum a ni a. He nawrhna avang hian India ram pumah mipui tan bank dawr theih an ni dawn lo.
UFBU-in he nawrhna a buatsaih chhan ber hi hapta khata ni nga chhung chauh hnathawh an phut vang a ni a. Mizoram chhunga bank hrang hrangte pawhin he nawrhna hi an zawm dawn a ni.
Bank hnathawkte nawrh tum avanga mipuiten harsatna an tawh lohna turin, union finance ministry chuan public sector bank, regional rural bank leh old-generation private sector bank-te chu Pathianni khan mipui dawr theih tura hawng turin thupek a chhuah a. Mizoram chhung hmun hrang hrangah pawh bank branch-te dan pangngaiin chawhma dar 10 atang khan inhawngin, Aizawl bikah chuan bank hrang hrangte chuan dawrtu an nei mang lo va, chutihrual chuan bank mamawhna nei dawrtu thenkhat pawisa la chhuak leh dah lut bakah, account hawng leh KYC buaipuite an awm bawk.
Thingtlang lamah bank dawrtu an nei nual nual nia thudawn a ni.
Hetih lai hian Pathiannia bank hawng tura ruahmanna siam a ni chu Mizorama kohhran leh tlawmngai pawl hrang hrang ten pawi an ti hle.
Council of Churches in Mizoram (CCM) chuan thuchhuah siamin Pathianni hi Kristiante tan sakhaw ni pawimawh tak a nih avangin India danpui hnuaia sakhaw zalenna tibuai zawnga ruahmanna siam chu tha an ti lo hle tih an tar lang a, hun lo kal zel turah Kristiante ni serh tibuai zawnga thutlukna siam tawh lo turin thuneitute an ngen a ni.
Central YMA pawhin thuchhuah siam nghalin Pathiannia bank hawn tum a ni chu pawi an tih thu leh, Mizoram bik tan he thutlukna hi kaltlangpui chi a ni em tih thuneituten ennawn leh rawh se tiin ngenna an lo siam bawk a ni.