Aizawl: Animal Husbandry & Veterinary Department, Mizoram State Veterinary Council (MSVC) leh Indian Veterinary Association (IVA) Mizoram tangkawpin Thawhtanni khan ‘World Rabies Day, 2026’ hman a ni a. AH &Vety Minister C. Lalsawivunga’n khuallian niin a hmanpui a, ui leh ran dang enkawl dan dik inzirtir uar a tul thu sawi.
BSI Hall, Khatla, Aizawl-ah ‘World Rabies Day, 2026’ hun hmanah Minister C. Lalsawivunga chuan India chu ui a hri (Rabies)-in a chenchilh ram a nih thu sawiin, khawvel puma he natna avanga thihna zaa 36 zet chu India-a thleng a nih thu a sawi a. Lyssa virus-in a thlen he natna tihbaiawm tak avang hian ram 150 chuangah kum tin mi 59,000 vel an thih thin thu leh, heng zinga zaa 95 hi Asia leh Africa ram atanga report a nih thu a sawi bawk.
WHO-in kum 2030-a khawvel pui atanga rabies umbo a tumnaah thawh hona tha a pawimawh thu sawiin, mipuite pawhin mawhphurhna laa ui leh ran dangte khuahkhirha enkawl dan dik inzirtirna uar lehzual a tul thu a sawi.
He hunah hian khualzahawm, AH&Vety Department Secretary Lalsangliana pawhin thu a sawi a; CVSc&AH Associate Professor Dr. Lallawmzuali Ralte-in ‘Stronger Together’ tih thupui hmangin hriat tur pawimawhte a zirtir bawk.
Inkhawmah hian World Rabies Day puala Essay Writing Competition result puan niin, minister hian lawmman a sem a ni.
World Rabies Day pual hian Inrinni kalta khan Aizawl khawpui chhung veng pali — Zemabawk North, Salem Veng, Ramrikawn leh Phunchawng-ahte ‘Free Anti-Rabies Vaccination Camp’ lo buatsaih tawh niin, Anti-Rabies Vaccine dose 407 (ui 358 leh zawhte 49) an lo pe tawh bawk a ni.