Aizawl: Land Revenue & Settlement Minister B. Lalchhanzova’n Chekbawk hmuna inkhawm buatsaihah Thawhtanni khan Chekbawk ram neitute hnenah land pass a hlan a. Chekbawk ramah inhmun plot 1,217 tihfel a ni tawh thu leh la tihfel lohte pawh chak taka bawhzui zel a nih thu a sawi.
Land pass hi a tahtawla hlan tura ruahman niin, Phase I hnuaiah hian mi 319 hnenah sem chhuah a ni.
Khuallian chuan November 11, 2025-a Maumual ram chin fel a nih hnuah tunah Chekbawk ram pass fel tawhte freezing order hlipa sem chhuah a ni ta chu lawmawm a tih thu sawiin politic-a inbeih zui nan hmang lo hram turin mipuite a chah.
Sorkar hmasaten an tihfel hman loh chhunzawm leh siam tha tura hma lak chu sorkar tih tur a nih thu sawiin thangthat lak tum leh insawisel zawnga hma lak vak vak aiin hna thawh chhunzawm zel chu mipuite duh dan a nih thu a sawi.
Tun chawlhkar chhung hian Ramhlun Sports Complex leh Zemabawk High School Veng ram buaina pawh chin fel a nih thu puan tum a nih thu a sawi bawk.
Asst. Director of Survey (G) V. Lalrindika’n technical report a pek atanga a lan danin Chekbawk ram hi tun hmaa veng lian panga (Salem, Venghnuai, Dam Veng, Thakthing leh Kulikawn Joint VC) hnuaia awm thin leh World Bank road a tlang hnuah Kulikawn Local Council hnuaia awm a ni a. Kum 1997, 2002 leh 2009-a house site plan-te a ram inkhuangrual loh leh harsatna hrang hrang a awm avangin sorkar chuan re-survey relin October 5, 2021 atanga September 30, 2022 inkar khan a pum puiin plan thar siam a ni.
Revision-ah hian sq metre 10,76,508.841 (107.651 hectares) survey niin plot 1,369 (mi mal ram 1,352 leh vantlang ram 17) siam a ni a; internal road km 13.90-a thui, 3.5m-a zau laih niin vantlang hmun hrang hrang (green area, thlanmual, bazar, sikul) hmun turte pawh ruahman tel a ni.
Kum 2023-2024-a revised plot anga LSC thar pek a nih khan lungawi lohna a awm avangin LSC pek chhuah pawh hlipin sorkar chuan Fact-Finding Committee a din a. Committee ruahmanna leh official-te endikna hnuaiah pass tihfel theih tawh plot 1,217-te chu freezing order hlipin hlan theih tura peih a ni ta a ni.
He hun hi Aizawl South II bialtu MLA Lalchhuanthanga leh AMC Ward 19 Corporator Dr. Lalmalsawma Nghaka te pawhin an hmanpui a ni.