Aizawl: Larsap General (Dr) Vijay Kumar Singh chuan ruihhlo do leh a thanga awk thalaite chhanchhuah kawngah sorkar leh khawtlang an tanrual zual a tul thu a sawi.
Kum 2026-2029 chhunga ruihhlo do beihpui thlakna tura ruahmanna, ‘State Action Plan to Combat Drug Menace 2026-2029’ chu Assembly Annexe Conference Hall, Aizawlah Thawhtanni khan larsap hian a tlangzarh a. Prime minister-in August 2, 2026-a a tlangzarh, chawlhkar 100 awh tur, ‘Nasha Mukh Bharat Sankalp Abhiyan’ leh India chu December 31, 2029-a ruihhlo awm lohna rama siam tum a nih thu a sawi.
Larsap chuan ruihhlo do dan tur ruahmanna tlangzarh tak chu khawtlang tanrualna leh inzirtirna behchhana thalaite ruihhlo laka chhanchhuahna tur a nih thu a sawi a. “Tun hi a bultanna a ni a, kum thum hnuah a rah chhuah kan hre thei dawn a, a hlawhtlin theih nan lungrual taka kan thawh ho a tul a ni,” a ti.
Khawzawl district chhunga Tlangmawi khua chu Mizorama ruihhlo laka fihlim hmasa ber khuaah puan an ni chu khaw mipuite a lawmpui thu sawiin, “Hei hian khawtlang inlungrualna a entir a, Mizoram pum ruihhlo laka fihlim siam turin mi tinin mawhphurhna an nei a ni,” a ti bawk.
He ruahmanna thar hi YMA kum puan ‘Ruihhlo Do’ nena inmil tak a nih thu larsap chuan a sawi a. Mizoram chu ramri thui tak nei leh India tana kawngkapui vengtu a nih avangin inthlahdah thiang a nih loh thu leh ruihhlo tawlhna atanga hlawk thut duhna a bo a tul thu a sawi a. ‘Operation Jericho’ leh ‘Hulhliap Short Stay Centre’ fakin ruihhloin Mizo thalai nunna a suat nasa lutuk chu veiawm a tih thu leh he beihpui hian rah tha a chhuah ngei a beisei thu a sawi a ni.