ZPM Party thuneitu sang leh Val Upa Council (VUC) dinchhuaktu, Bualhranga’n bânna lehkha a ziaha Chief Minister Lalduhoma a puhna chungchangah chief minister hi mipui hmaah a rang lama sawi fiah ngei turin an phut tih Mizoram Pradesh Congress Committee (MPCC) chuan an sawi.
September 21, 2026-a VUC atanga Bualhranga a bânna lehkha ziakah hian point hlawm lian deuh deuh pali tar lan a ni a, chungte chu sorkar kalphung dik lo chungchang pahnih leh chief minister ei rukna leh mipat hmeichhiatna chungchanga a fihlim loh nia puhna pahnih te an ni.
Nilainia Aizawl Press Club-a thu thar thehdarhtute an kawmnaah MPCC General Secretary Lalhmachhuana chuan ram hmai lanna ber leh ZPM party chhungril zawng zawng chiang taka hretu, Bualhranga ngeiin chief minister a puh ta mai chu pawi an tih thu leh tanchhan mumal tak nei lovin hetianga ziak meuha mualpho taka puhtu hian dawt leh thu belhchian dawl lo hmangin a tiduhin a rinawm loh tih sawiin, he thil thleng hi mak an tih thu leh an ngaihnep loh thu a sawi.
“Mizoram chief minister ngat hetiang anga mipat hmeichhiatna leh ei rukna chungchanga puh a lo ni ta mai hi hnam tan mualphona tawpkhawk a nih avangin pawi kan ti tak zet a. Hnam chanchina thil thleng ngai hauh lo, thleng leh tur pawha an duh loh thil a ni,” a ti.
Kum 2023 inthlanpuia mipuiin beiseina sang tak nena ZPM sorkar an enchhin hi hnathawh tak tak awm si lova tawngkam thiamna hmanga engkim sawi mam thin an nih zia leh sorkar kalphung tha a awm lohzia chiang takin a lang tawh tih sawiin Lalhmachhuana chuan, VUC pawhin sorkar kalphung dik lo hi anmahni chhungkuaa inzilhhau leh inching fel mai tur an nih laia lehkha ziak meuha thu a lo darh ta hi thil tha lo tak a nih thu leh, anmahni chhungkuaa inzilhhau leh inching fel mai tur an nih laia hetianga lehkha ziak meuh a thu a lo darh ta hi sawi fiah ngei an phut tih a sawi.