Russian-ten a hma zan zankhuaa egergy hmunte beihna avangin Ukraine khawchhak lam, Dnipropetrovsk region-a mi 6,00,000 chuangin electricity an nei lo tih Ukrainian energy provider chuan a sawi.
Pavlohrad, Samarivskyi, Kamianske leh Dnipro district bakah Dnipro khawpuia chengte chuan Pathianni khan electricity an indaih lo hle tih power company DTEK chuan Telegram-ah a tar lang.
Engineer-ten hmunhma chhiate siam that tuma an thawk lai thlalak thehdarh a ni a; mahse, ‘beihna a thlen nawn reng avangin siam that a hautak hle’ tih DTEK chuan an tar lang.
Ukraine hian thlasik thleng mekah Russia beihna ni tin deuhthaw an tuar a, drone leh missile hmangin an power pekna hmun hrang hrang an bei thin.
Pathianni vek khan Russian-ten an hmuhma an tihchhiatsak avangin hmarchhaka Kharkiv region-ah chuan Ukrainian 2,50,000 chuangin power an nei lo bawk.
Zlatopil Mayor Mykola Baksheyev chuan, “Thi leh hliam erawh kan awm lo,” tiin Telegram-ah a tar lang.
“Power engineer-ten a chhiate siam that tumin an thawk mawlh mawlh reng a. Hetih rual hian engtikah nge electricity supply hi a pangngaia a awm leh thei hun tur erawh sawi lawk theih a ni lo,” a ti.
Inrinniah khan Ukrainian egergy ministry chuan Russia-in nasa taka an energy hmunhmate an kah avangin region pangaa chengte thim hnuaiah an awm a, Kyiv-ah pawh electricity transmission a buai phah tih a puang bawk.
President Volodymyr Zelenskyy-a chuan Thawhlehni leh Nilainia US ruahmanna anga Abu Dhabi, UAE-a Kyiv nena an pathuma an inbiakna tur lo thleng tur hmain Russia hian thapui an thawh thar nasa niin a puh.
Russian defence ministry chuan an sipaiten ‘Ukrainian tuialhthei leh egergy hmunhmate chu an bei chhunzawm zel dawn’ tih Telegram channel-ah a lo puang tawh a, heng hmunte hi indona atana sum leh paia Ukrainian sipaite puitu niin an sawi a ni.