Aizawl: MNF National Core Committee member R Lalzirliana chuan ZPM sorkar chu nakkin zela thangtharten an la rulh turin sum bat char char a tum nia puhin, sorkar sum enkawl dan chu rapthlak a tih thu a sawi.
Thawhtannia MNF Hnam Run-a chhung inkhawmah thu sawiin minister hlui R Lalzirliana chuan, Chief minister Lalduhoma chu eptu-a a awm laia sum enkawl thiam ber anga intar lang si, Finance Minister a nih hnua bat belh bak thiam hlei lo nia sawiin, Mizoram budget hnuhnung ber Rs vaibelchhe 17,076.92 a nih laia leiba Rs vaibelchhe 19,085.15 niin, budget aia leiba a tam zawkna Rs vaibelchhe 2,008.23 a tling chu Mizoram chanchina a la awm ngai loh thu a sawi.
Chief minister-in Darzo kai tui khuap, Vapar sea plane tumna tur tui khuap leh mau hriak sawr thlengin thutak lo leh mipuite tinui dur dur thei khawpa dawt a sawi nasa nia puhin, hmalakna pakhat mah hmuh tur a awm lo hrim hrim, a ti bawk.
Kawlptha chungchangah R Lalzirliana chuan, hydel leh solar hmanga intodelh tum sia Serlui B an outsource daih chu dem zuiin, MNF leh Congress sorkar laia siam tawh thin midang kuta an hlan avangin tualchhung tharchhuah ngei pawh lei a ngai tawh dawn a, sorkar kal mek hnuaiah kawlphetha-a intodelh a hla tual tual dawn niin a sawi.